Elbasy Joldaýynda ulttyq valıýtaǵa senimdi nyǵaıtýǵa erekshe mán berdi - A.Perýashev
ASTANA. QazAqparat - Memleket basshysynyń Joldaýynda ulttyq valıýtaǵa senimniń nyǵaıýyna erekshe mán berdi. Bul týraly búgin elordadaǵy Táýelsizdik saraıynda Elbasy Nursultan Nazarbaev Qazaqstan halqyna Joldaýynan keıin Parlament Májilisiniń depýtaty Azat Perýashev málim etti.
«Elbasy tek munaıǵa ǵana senýdiń qajet joq ekenin qadap aıtty. Shıkizattyq emes sektorǵa, ıaǵnı jeńil ónerkásipti jáne basqa da salalardy damytýǵa mán berýge ekpin qoıylyp otyr. Qajetti kıim-keshekter men aıaq kıimderdi ózimizde shyǵarý kerek. Atap aıtqanda, ishki naryqta aınalatyn taýarlardy ózimiz óndirsek, árıne, onyń qundylyǵy teńgemen esepteledi», - dedi depýtat. Osy oraıda A.Perýashev Qazaqstannyń ishki naryǵyn otandyq taýarlarmen toltyrý arqyly ulttyq valıýtaǵa senimdi arttyrýǵa bolatynyn, sondaı-aq elimizdiń taýarlaryna eleýli suranys ósetindigin jetkizdi. Esterińizge sala keteıik, búgin Qazaqstan Prezıdenti Nursultan Nazarbaevtyń Qazaqstan halqyna Joldaýy «Qazaqstan jańa jahandyq naqty ahýalda: ósim, reformalar, damý» taqyrybyn qamtydy. «Bizdiń Qazaqstanymyz da, esterińizge alyńyzdar, KSRO kúıreý dáýirinde ómirge keldi. Táýelsizdigimizdiń alǵashqy onjyldyǵy eń qıyn jyldar boldy. Biz eger eske alsaq, munaısyz-aq kún keshkenbiz. Táýelsiz Qazaqstan qashanda syrtqy ekonomıkalyq qaterlerden tys damyp keldi. Toqsanynshy jyldardyń basy biz úshin jaıly boldy dep kim aıta alady?» - dedi N.Nazarbaev. Osyny aıta kele, Elbasy ondaı qıynshylyqtar tez umytylyp qalatynyn, bunyń jaqsy qasıet ekenin, degenmen eske túsirýge týra keletinin aıtty. «KSRO quldyrap, biz sonyń jeke synyǵy bolyp qalyp, qaıda baratynymyzdy, ne isteıtinimizdi bilmeı, ne qarajatsyz, ne kómeksiz qalǵan kezimiz de boldy. Ekonomıka toqtap, el jumyssyz qaldy. Zeınetaqy tóleıtin qarajat ta bolmady. Sondaı, shynyn aıtqanda, eń qıyn kezderdi de bastan keshirdik. Táýelsizdigimizdi saqtap qalyp, memleketti nyǵaıttyq. Endeshe, bizge birigý arqyly aldaǵy qıynshylyqty eńserý de esh qıynǵa túspeıdi», - dedi N.Nazarbaev. Sonymen qatar Memleket basshysy óz sózinde kúndelik ómirge qajetti nan men sútti, shujyqty, kıim-keshekti tek teńgege satyp alatyndyǵymyzdy basa atap ótti. Al dollar shetelden baryp saýda-sattyq jasaıtyndarǵa qajet ekendigin aıtty. «Dollarsyzdandyrý tetikterin keńeıtý arqyly ulttyq valıýtaǵa senimniń nyǵaıýyna qol jetkizý mańyzdy. Bul máselede Úkimet pen Ulttyq bank naqty usynystar ázirleýi qajet», - dedi Elbasy. «Depozıtterdi teńgemen saqtaý tıimdi, paıyzy joǵary. Al depozıtterdegi dollardyń paıyzy óte tómen bolady, buǵan bankter kele jatyr. Bul - dollarsyzdandyrýdyń bir tetigi», - dedi Memleket basshysy.
