Elbasy Joldaýynda ekonomıkanyń ár salasynyń damý joly naqty aıqyndalǵan - Almatydaǵy kezdesý
/strong>Aqpannyń 12-si. QazAqparat /Názıra Eleýhan/ - Búgin Almatyda Qazaqtyń Abylaı han atyndaǵy Halyqaralyq qatynastar jáne álem tilderi ýnıversıtetinde «Bolashaq» qaýymdastyǵynyń túlekteri «Kazkommertsbank» AQ-nyń Basqarýshy dırektory Maǵjan Áýezovpen jáne «Qazaqstan Halyq banki» AQ-nyń Basqarma tóraǵasynyń orynbasary Dáýren Qarabaevpen kezdesti,
dep habarlaıdy QazAqparat.
Kezdesý barysynda «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Elbasynyń Qazaqstan halqyna Joldaýy talqylanyp, qarjy sektoryndaǵy búgingi jaǵdaı saralandy. Sonymen qatar, «Bolashaq» baǵdarlamasynyń búgini men erteńi paıymdaldy.
«Qazaqstan Halyq banki» AQ-nyń Basqarma tóraǵasynyń orynbasary Dáýren Qarabaev Joldaýdyń negizgi basymdylyqtaryna toqtala otyryp, el ekonomıkasyń damý jolyna sholý jasaı kele, «Elimizdiń bank júıesi ár túrli kezeńnen ótti. Bir kezderi bankterdiń kóbeıip ketkenin bilesizder. Búginde bankter sandyq túrden, sapaly túrde ósýge kóshýde. Júıe óziniń básekege qabilettiligin arttyrýda», dep atap ótti.
«Qarjy sektory úshin Elbasy Joldaýynyń úlken mańyzy bar. Joldaýda ekonomıkanyń ár salasynyń damý joly naqty aıqyndalǵan. Memleket jumys oryndaryn saqtaýǵa jáne jańa jumys ornyn qurýǵa at salyp, barlyq múmkindikterdi jasaýda. Ásirese, aımaqtar men aýyldy jerlerde jumys ornyn saqtap qalýǵa mán berip otyr. Bul týraly Joldaýda da aıtylyp, mańyzdylyǵyna mán berildi», dedi «Kazkommertsbank» AQ-nyń Basqarýshy dırektory Maǵjan Áýezov. Ol sonymen qatar, bank sektory iri memlekettik emes jumys berýshi bolyp sanalatynyn aıta kelip, eńbek naryǵynda joǵary básekelestik bar jáne bul aldaǵy jyldary saqtalady dep málim etti.
«Sizder jyl saıyn, elimizge qaıta oralyp jatqan bolashaq túlekterimen de básekeles bolasyzdar. Degenmen, jumys isteımin degen jigeri bar ár túlekke jumys orny tabylady. Elimizde daǵdarysqa qaramastan ár túrli kompanııalar ashylyp jatyr», dedi M.Áýezov.
Sondaı-aq kezdesý qatysýshylary stýdentterdiń suraqtaryna jaýap berip, keńester aıtty.
