Elbasy Joldaýynda bilim salasynyń jan-jaqty qamtylǵany qatty qýantady - Dınar Nóketaeva

«Jańǵyrý - jańarýǵa degen umtylysty zamanaýı jańalyq arqyly aıshyqtaıdy. Elbasy N.Á.Nazarbaevtyń 31 qańtardaǵy «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna jarııalaǵan Joldaýynyń astarynda osyndaı asa mańyzdy tyń ıdeıa jatyr. Bul - egemendiktiń 25 jyldyǵyn artqa tastaǵan Uly Dala eliniń ekinshi shırek ǵasyrǵa umsynǵan jańashyl bastamasy deýge tolyq negiz bar. Aqparttyq tehnologııalar álem aldyna sát saıyn jańa qaýipterdi týyndatyp qana qoımaı, damýy dóńgelengen, lezde basqasha ári zamanaýı oılaýǵa ıtermelegen jańalyqtardy ákelip jatyr. Sondyqtan, ýaqytqa qalyptasýdy alǵa tartatyn aqparattyq tehnologııanyń júris-turysyn aldaǵy kúnderdiń jańa qadamdaryn aldyn-ala boljap, oǵan myqty tetikterdi oılastyra alatyn kemeńger strategter ǵana ıgeredi. Ult Kóshbasshysy N.Á.Nazarbaevtyń Qazaqstan halqyna jasaǵan Joldaýyna dál osyndaı baǵa berýge bolady. Óıtkeni, Qazaqstannyń úshinshi jańǵyrýy - elimizdiń ekonomıkalyq damýynyń ınnovatsııalyq ózegine aınalyp, básekege qabiletin arttyra túspek.

Budan keıin memleket sandyq tehnologııalarǵa negizdelgen bolashaǵy zor baǵyttarǵa aıryqsha mán beretin elge aınalmaq. Onyń ishinde eń basty dúnıe - bilim berýde jatqanyn bizder, ıaǵnı pedagogtar men bilim salasynyń mamandary aıqyn túsinip otyrmyz.

Jahandaný tamyryn tap basatyn Elbasy N.Á.Nazarbaevtyń bul jolǵy Joldaýynda bilim salasynyń jan-jaqty qamtylǵany qatty qýantady. Óıtkeni, bıylǵy basty baǵdarlamalyq qujattyń eń negizgi ereksheligi - ıntellektýaldy ult qalyptastyrý jolynda aqparattyq tehnologııalarǵa negizdelgen ınnovatsııalyq damyǵan qoǵam qurýdy maqsat etýde jatyr.

Joldaýda bilim qoǵamyn damytýǵa arnalǵan qundylyqtar eki birdeı basymdyqta jarııalanǵanyn baıqaımyz. Máselen, «Ekonomıkanyń jedeldetilgen tehnologııalyq jańǵyrtylýy» atty birinshi basymdyqta aqparattyq tehnologııalardy bilim júıesinde qaryshtatý tetikteri aıtyldy. «Biz tsıfrlyq tehnologııany qoldaný arqyly qurylatyn jańa ındýstrııalardy órkendetýge tıispiz. Bul - mańyzdy keshendi mindet. Elde 3D-prıntıng, onlaın-saýda, mobıldi bankıng, tsıfrlyq qyzmet kórsetý sekildi densaýlyq saqtaý, bilim berý isinde qoldanylatyn jáne basqa da perspektıvaly salalardy damytý kerek. Bul ındýstrııalar qazirdiń ózinde damyǵan elderdiń ekonomıkalarynyń qurylymyn ózgertip, dástúrli salalarǵa jańa sapa darytty. Osyǵan oraı, Úkimetke «Tsıfrlyq Qazaqstan» jeke baǵdarlamasyn ázirleýdi jáne qabyldaýdy tapsyramyn» degen Elbasy ınnovatsııalyq biliktilikke basa nazar aýdarylatynyn jetkizdi.

Al tórtinshi basymdyq retinde atalǵan «Adamı kapıtal sapasyn jaqsartý» tarmaǵynda «Eń aldymen, bilim berý júıesiniń róli ózgerýge tıis. Bizdiń mindetimiz - bilim berýdi ekonomıkalyq ósýdiń jańa modeliniń ortalyq býynyna aınaldyrý. Oqytý baǵdarlamalaryn synı oılaý qabiletin jáne óz betimen izdený daǵdylaryn damytýǵa baǵyttaý qajet. Sonymen birge, IT-bilimdi, qarjylyq saýattylyqty qalyptastyrýǵa, ultjandylyqty damytýǵa basa kóńil bólý kerek. Qala men aýyl mektepteri arasyndaǵy bilim berý sapasynyń alshaqtyǵyn azaıtý qajet» degen Memleket basshysy úshtildi bilim berý týraly aıtyp, onyń ishinde ana tilimizdiń róline toqtalady. Qazaq tiliniń basymdyǵy saqtalyp, ony damytýǵa zor kóńil bólinetindigi kóńildegi kúdikti seıilteri aıqyn.

Prezıdenttiń bastamasymen júzege asyp jatqan «Barshaǵa arnalǵan tegin kásiptik-tehnıkalyq bilim berý» jobasy jaqyn kúnderi jemis beretini kóńilge qýanysh uıalatady. Óıtkeni, tegin oqytýmen eń áýeli jumyssyz jáne ózin ózi tıimsiz jumyspen qamtyǵan jastar, sondaı-aq kásiptik bilimi joq eresek adamdar qamtylady. Sonymen qatar, kásiptik bilim berý júıesinde, Elbasy tapsyrmasyna sáıkes, ekonomıkadaǵy jańa óndirister úshin mamandar daıyndalmaq.

Bıylǵy Joldaýdyń negizgi ereksheligi - Altaı men Atyraýdyń arasyn alyp jatqan ulanǵaıyr Uly Dala eliniń damýyndaǵy qamtylmaǵan sala qalmaǵan. Sonymen qatar, ol jerden kez kelgen ujym óz qyzmetine qajetti oryndaý tetikterin taıǵa basylǵan tańbadaı anyq kóre alady. Osydan-aq bul Joldaý Táýelsizdiktiń 25 jyldyǵyn sátti qorytyndylaǵan Qazaqstannyń keler shırek ǵasyrǵa ustanǵan basty barometri bolatynyn baıqaımyz», - Dınar Nóketaeva.