Elbasy joldaýynda bilim salasyna úlken basymdyq berilip otyr - Bilim mınıstri
ASTANA. 1 aqpan. QazAqparat /Qanat Mámetqazyuly/ -Elbasynyń aǵymdaǵy jylǵy joldaýynda bilim salasyna úlken basymdylyq berilip otyr.
Búgin L. Gýmılev atyndaǵy Eýrazııa ulttyq ýnıversıtetinde 2011 jylǵy 28 qańtardaǵy QR Prezıdentiniń Qazaqstan halqyna joldaýyn túsindirýge arnalǵan jıyn barysynda Bilim jáne ǵylym mınıstri Baqytjan Jumaǵulov osylaı málim etti.
Jıyndy ashyp sóz sóılegen Bilim jáne ǵylym mınıstri Baqytjan Jumaǵulov eń aldymen Elbasynyń aǵymdaǵy Joldaýynda keltirilgen birqatar kórsetkishterge toqtalyp ótti. «Joldaýda mejelengendeı aldaǵy 10 jyl ishinde JІÓ ósimi kem degende 30 paıyzdy quraýy tıis. Sonymen qatar, ekonomıkanyń shıkizattyq emes sektory salasyndaǵy ınvestıtsııa aýqymy 30 paıyzǵa kóbeıedi. Damýdyń mańyzdy kórsetkishi shaǵyn jáne orta bıznestiń jalpy ónimdegi úlesi bolyp tabylady jáne ol 40 paıyzǵa deıin artady. Halqymyzdyń sany 2020 jylǵa deıin 18 mln.-ǵa jetse, onyń 40 paıyzy bilikti mamandar bolýy tıis», - dedi B. Jumaǵulov. Sonymen qatar, mınıstr joldaýda alǵa qoıylǵan mindetterdiń barlyǵy egjeı-tegjeıli eseptelgenin aıtyp, ondaǵy ár tapsyrmanyń naqty oryndalatynyna nazar aýdartty.
«Bıylǵy joldaýda da basty maqsat halyqtyń ál aýqatyn jaqsartý ekendigi atap kórsetildi. Bul rette bilim salasyna da úlken basymdyq berilip otyr. Ótken jyldyń jeltoqsanynda Bilim berýdi damytýdyń 2011-2020 jyldarǵa arnalǵan memlekettik baǵdarlamasy qabyldanǵany belgili. Al búginge deıin atqarylǵan isterge kóz júgirtsek, qurylymdyq reforma aıaqtalyp qalǵanyn baıqaımyz. Bilim berýdiń barlyq deńgeılerinde halyqaralyq standarty júıesine sáıkes keltirilýde. Onyń ústine salany qarjylandyrý kólemi birneshe jyldar boıy artyp otyr. Byltyr bilim salasyn qarjylandyrýdyń kórsetkishi jalpy ishki ónimniń 4,1 paıyzyna jetti», - dedi mınıstr.
