Elbasy Joldaýyn júzege asyrýǵa árbir qazaqstandyq óz úlesin qosýy tıis - S.Seıfýllın atyndaǵy QazATÝ stýdenti
ASTANA. 2 aqpan. QazAqparat - Patenttik nemese avtorlyq quqyqty qorǵaý jáne onyń quqyqtyq qorǵalýyna kepildik bere alatyndaı jaǵdaıǵa jetsek, ındýstrııalyq-ınnovatsııalyq jańalyqtardy ashatyn azamattar kóbeıedi.
Bul pikirin búgin Elbasynyń Joldaýyn talqylaýǵa arnalǵan shara barysynda S.Seıfýllın atyndaǵy Qazaq agrotehnıkalyq ýnıversıtetiniń 3-inshi kýrs stýdenti Aıtýǵan Noǵaıbaeva bildirdi.
«Elbasymyzdyń bıylǵy Joldaýynda áleýmettik jańǵyrtýǵa jáne jahandaný zamanynda eldi damytýǵa qatysty negizgi tetikter men oılar alǵa tartyldy. Olardyń arasynda Qazaqstandaǵy ındýstrııalyq-ınnovatsııalyq jobalardy júzege asyrý máseleleri bar. Qazir zııatkerlik menshik qaýipsizdigi máselesi kóptep kóterilýde. Bul ınnovatsııalyq jobalardyń kóbeıýine yqpal etedi dep senemin. Patenttik nemese avtorlyq quqyqty qorǵap, onyń quqyqtyq qorǵalýyna kepildik bere alatyndaı jaǵdaıǵa jetsek, ındýstrııalyq-ınnovatsııalyq jańalyqtardy ashatyn azamattar kóbeıedi. Qazaqstan álemge óz ónimimen, óz ınnovatsııalarymen tanylar edi», - deıdi ol.
Stýdenttiń pikirinshe, adamı kapıtal memlekettiń damý deńgeıin kórsetetin - aına. «Qazaqstanda bilim salasy álemdik deńgeıdiń bel ortasynda júr. Sondyqtan bilim salasyn jetildirýge kúsh salýymyz qajet. Ol úshin salany jemqorlyqtan tazartýymyz kerek. Bul ózekti másele. Salada oryn alyp otyrǵan olqylyqtardyń sebebiniń biri osy. Zańdarǵa ózgerister engizip, Joldaýda kórsetilgen reformalarǵa kirisý kerek. Joldaýda kórsetilgen zııatkerlik mektepter, Nazarbaev Ýnıversıteti sııaqty bilim oshaqtaryn kóbeıtsek, eldegi bilim salasynyń deńgeıi joǵarylaıdy. Bilim berýdi kúsheıtý kadrlardyń sapasyna tikeleı yqpal etedi», - deıdi bolashaq maman.
«Meniń oıymsha, Elbasy Joldaýyndaǵy basym baǵyttardy júzege asyrýmen bılik organdary ǵana aınalyspaýy tıis. Naqty nátıjelerge qol jetkizilý úshin oǵan árbir qazaqstandyq óz úlesin qosýy tıis», - dep túıindedi oıyn A.Noǵaıbaeva.
