Elbasy Joldaýyn júzege asyrýdy eń aldymen Úkimet qolǵa alýy kerek - sarapshy pikiri

ASTANA. QazAqparat - Memlket basshysynyń Joldaýyn júzege asyrýdy eń aldymen Úkimet qolǵa alatyn bolsa bir jylda tabysqa jete alamyz. Mundaı pikirdi «Qazaqstannyń ekologııalyq uıymdary qaýymdastyǵy» zańdy tulǵalar birlestiginiń basqarma tóraıymy Aıgúl Soloveva bildirdi, dep habarlaıdy QazAqparat.

«Memleket basshysy birinshi kezekte nazarymyzdy tórtinshi ónerkásiptik revolıýtsııaǵa aýdardy. Buǵan deıingi Strategııa-2050-de álemniń damyǵan 30 eliniń qataryna kirýge umtylýymyz qajettigi aıtylǵan edi. Al sol kezde barlyq damyǵan elder tórtinshi ónerkásiptik revolıýtsııaǵa baǵyt aldy. Sondyqtan da Joldaýdaǵy 10 maqsat Strategııa-2050-de belgilengen baǵyttardy damytatyn bolady», - dedi ol.

Sonymen qatar ol qoǵamdyq sanany jańǵyrtý máselesine de toqtalyp ótti.

«Memleket basshysynyń bul Joldaýy elimizdiń 2050 jylǵa deıingi strategııasynda basty mindetteri oryndaý qarqynyn kúsheıtýge baǵyttalǵan. Sondaı-aq «Rýhanı jańǵyrý» aıasynda bizde sanamyzdy jańǵyrtýymyz qajet. Sebebi qazirgi álem múldem bólek, múldem basqa qarqynda ilgerilep keledi. Kóp aıtyla bastaǵan jasyl, serpindi, tsıfrly, ınnovatsııalyq tehnologııalar óz deńgeıinde júzege asyrylyp otyrǵan joq. Demek, Úkimet Memleket basshysynyń Joldaýyn júzege asyrýdy eń aldymen ózi bastaıtyn bolsa, onda bir jyldan keıin aıtarlyqtaı tabysqa qol jetkize alamyz», - dedi Aıgúl Soloveva.