Elbasy Joldaýyn zańnamalyq turǵydan qamtamasyz etý bizdiń aldaǵy basty mindetimiz - Q. Toqaev
ASTANA. Aqpannyń 25-i. QazAqparat /Qanat Mámetqazyuly/ - Elbasy Joldaýyn zańnamalyq turǵydan qamtamasyz etý bizdiń aldaǵy basty mindetimiz. Búgin QR Parlamenti Senatynyń jalpy otyrysynda Palata Tóraǵasy Qasym-Jomart Toqaev osylaı málim etti,
dep habarlaıdy QazAqparat.
Sóz arasynda Qasym-Jomart Toqaev osy aıda Senat depýtattary bıylǵy jylǵy Elbasy Joladýynyń negizgi qaǵıdattaryn jan-jaqty túsindirý maqsatynda óńirlerge saparmen baryp kelgenin aıtyp, onda depýtattardyń jergilikti halyqpen kezdeskenin, Parlament pen «Nur Otan» HDP-nyń ekonomıkany damytýǵa baǵyttalǵan maqsat-mindetteri týraly tolyqqandy aqparat bergenin atap ótti.
«Palata depýtattary aımaqtardyń damýyn jáne qazaqstandyqtardyń turmysyn odan ári jaqsartý úshin óńirlerde atqarylyp jatqan jumystar barysymen tikeleı tanysty. Kezdesýlerde qoǵamdy tolǵandyratyn kókeıkesti saýaldarǵa jaýap berilip, talap-tilekter tyńdaldy. Keń baıtaq elimizdiń shalǵaı óńirlerinde de, óndiris oryndarynda da Elbasy Joldaýyna tolyq qoldaý kórsetilýde. Otandastarymyz Prezıdentke kámil senetinin, qolǵa alǵan strategııalyq baǵdarlamalardyń oryndalýyna senimdilikpen qaraıtynyn aıtyp jatyr. Eń bastysy, ótkizilgen kezdesýlerden keıin joldaýdan týyndaıtyn mindetterdi júzege asyrý úshin árbir qazaqstandyq aıanbaı eńbek etip, elimizdiń órkendeýine laıyqty úles qosýǵa daıyn ekenine tolyq kóz jetkizdik. Osy mańyzdy mindetterdi zańnamalyq turǵydan qamtamasyz etý bizdiń alda turǵan basty maqsatymyz. Sondyqtan joldaýda kórsetilgen zań jobalaryn ýaqtyly qarap, ony sapaly túrde qabyldaý kerek», degen Palata Tóraǵasy Q. Toqaev óz áriptesterin osyndaı mindetti júzege asyrýda jemisti eńbek etýge shaqyrdy.
