Elbasy Joldaýyn túsindirýde QHA áleýetin tolyqtaı paıdalaný qajet

ASTANA. QazAqparat - Búgin elordada Qazaqstan halqy Assambleıasy Dostyq úıleri men óńirlerdegi «Qoǵamdyq kelisim» keńesteri dırektorlaryna arnalǵan Elbasynyń Qazaqstan halqyna Joldaýyn túsindirý máseleleri boıynsha respýblıkalyq keńes ótti, dep habarlaıdy QazAqparat.

Shara barysynda Qazaqstan halqy Assambleıasy hatshylyǵynyń sektor meńgerýshisi Azat Joldybaev QR Prezıdentiniń Joldaýy men bılik tarmaqtary arasyndaǵy ókilettikterdi qaıta bólý jónindegi úndeýin halyqqa túsindirýde Dostyq úıleri men keńesterine zor mindet júkteletindigin basa aıtty.

 

«Máselen, Almatydaǵy Dostyq úıi bazasynda biz osy aıdan bastap 5 naýryzǵa deıin shamamen 18 respýblıkalyq sharany josparlap otyrmyz. Bul 18 sharanyń 14-i tikeleı etno-mádenı birlestiktermen júrgiziledi. Jumys formaty dóńgelek ústel, semınar, túrinde bolady. 2 shara jastardyń arasynda ótkiziledi. Bir shara ǵylymı-sarapshylyq toptardyń qatysýymen ádistemelik baǵytta júrziledi. Mundaı jumystar elimizdiń barlyq óńirlerinde júrgizilýi tıis»,- dedi Joldybaev.

 

Bul rette mundaı sharalardyń mindetti túrde respýblıkalyq aýqymda bolýy qajet emestigin basa atap ótti.

«Olardyń barlyǵy da mańyzdy. Óıtkeni, Qazaqstan halqy Assambelıasynyń resýrstaryn paıdalana otyryp, Joldaýdyń, Konstıtýtsııalyq reformanyń mánin árbir adamǵa jetkizý qajet», - dedi ol.

 

Keńes barysynda QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty Joldaýyn jáne konstıtýtsııalyq reformany túsindirýdi uıymdastyrý, «EKSPO-2017» kórmesi boıynsha jumys josparyn iske asyrý jáne oǵan qatysýǵa daıyndyq barysy qaraldy. Munan bólek, Dostyq úılerin damytýdyń 2017-2020 jyldarǵa arnalǵan tujyrymdamasyn iske asyrý boıynsha is-sharalar josparyna usynystar talqylandy.