Elbasy Joldaýy - zaman talaby

 Ulttyq teńdiktiń, para-parlyqqa umtylystyń jarqyn belgileri - etnostyń, qoǵam men memlekettiń ornyǵýy men damýynyń mindetti sharty ispettes. Ulttyq ıdentıfıkatsııalaný men ultshyldyq adamdar qaýymdastyǵyn nárlendiredi, ony qa­rapaıym qaýymdastyqtan ulttyq qaý­ym­dastyqqa aınaldyryp, óziniń jeke memleketin, mádenıetin, ıdeologııasyn qurýǵa múmkindik týǵyzady.

Qazaq halqynyń, Uly Dala kóshpendileriniń tamyry tereńde jatqan ejelgi tarıhy, sondaı-aq, Reseı ımperııasy men KSRO quramyndaǵy tarıhy bar. Osy memlekettik qurylymdardyń sheńberinde jasandy jolmen jańa ult qurýǵa áreketten túk shyqpady.

Kezin­de Elbasymyz Nursultan Nazarbaev «Ǵasyrlar toǵysynda» kitabynda aıtyp ótkendeı, «Keńes keziniń ózinde shyn ulttyq memlekettilik taptyq sıpattan ulttyq sıpatty joǵary qoıý jolymen júzege asatynyna kóz jete bastady. Ómirdiń barlyq salasyna «jańa tarıhı qaýymdastyq - keńes halqynyń» moraldyq kodeksin kúshtep engizý adamdardyń ulttyq sezimin, halyqtardyń óziniń etnıkalyq tegin tanýǵa degen umtylysyn joıyp jibere almady.

Prezıdent Joldaýda Úshinshi jańǵy­rýdyń negizgi bes basymdyǵyn aıqyndap berdi:

- ekonomıkanyń jedeldetilgen teh­no­logııalyq jańǵyrýy;
- dástúrli bazalyq salalardy da­mytýǵa serpin berý;

- eńbek naryǵyn jańǵyrtý, makro­ekonomıkalyq turaqtylyq;

- adamı kapıtal sapasyn jaq­sartý;

- ınstıtýttsıonaldyq ózgerister, qaýip­sizdik jáne sybaılas jemqorlyqpen kúres.

Bul basymdyqtar ekonomıkanyń álemdik ósiminiń orta deńgeıden joǵary qarqynyn jáne 30 ozyq eldiń qataryna qaraı ilgerileýdi qamtamasyz etedi.

Shaǵyn maqalada atalmysh basym­dyq­tarǵa tolyqqandy sıpattama berip, tal­daý múmkin emes. Degenmen de, oraıy kelgende ózimizdi tolǵandyratyn keıbir jaılar jóninde oıymyzdy ortaǵa salýdy jón sanaımyz. Áńgime adamı kapıtal sapasyn jaqsartý jóninde bolmaq. Osy oraıda qaımana qazaq úshin asa mańyzdy sanalatyn mynadaı jaıtty aıtpaı ketýge bolmas. 

Prezıdent N.Nazarbaevtyń egemendigimizdiń alǵashqy jyldarynan bastap mınıstrler men oblys ákimderine tamyr-tanystyqtan, sybaılas jemqorlyqtan qoly, rýshyldyqtan sanasy taza adamdardy ornalastyrýdy tereńnen oılap, osy baǵytta ustamdylyq tanytyp otyrýyn rýshyldyq ylańyna tosqaýyl qoıý maqsatynan týyndaǵan izgi nıet dep qabyldaǵanymyz jón.

Osy oraıda akademık T.Saıdýllınniń «ultshyldyqsyz ult qalyptaspaıdy, al, ultshyldyǵyn joǵaltqan ult ózin-ózi saqtaı almaıdy. Bul qarapaıym aqıqat eshbir dáleldeýdi kerek etpese kerek-ti» degen sózderimen kelispeske bolmaıdy.

Qazaqstan Respýblıkasy ekonomıkalyq jáne áleýmettik damý kórsetkishteri jóni­nen TMD elderi arasynda aldyńǵy orynǵa shyqty. Dúnıejúzi memleketteriniń sanatynda naryqtyq ekonomıkalyq el retinde moıyndaldy. Qazir álem Qazaq elin Or­talyq Azııa aımaǵyndaǵy damyǵan kósh­basshy demokratııalyq el retinde tanıdy.

Táýelsizdik jyldarynda Qazaqstan Respýb­lıkasy aımaqtaǵy geosaıası turaqtylyq pen qaýipsizdikti qamtamasyz etý jolynda ulan-ǵaıyr eńbegimen halyqaralyq qaýymdastyqtyń tolyqqandy múshesine aınaldy. Aıtalyq, 2007 jyly jeltoqsanda Eýropadaǵy Qaýipsizdik pen yntymaqtastyq uıymyna qaýymdasqan 56 memlekettiń Syrt­qy ister mınıstrleriniń Qazaqstannyń osy uıymǵa tóraǵalyq qyzmet atqarýyn maquldap daýys berýi, Qazaqstannyń 2010 jylǵy 3 tamyzda osy uıymǵa Tóraǵa bolyp bekitilýi sonyń jarqyn dáleli bolyp tabylsa kerek. Qazaqstan TMD elderiniń arasynan atalmysh uıymǵa tóralqalyqqa saılanǵan birinshi memleket! Bul sheshim halyqaralyq qaýymdastyqtyń Qazaqstan halqynyń Táý­el­­sizdik jyldaryndaǵy tabystaryna bergen laıyqty baǵasy boldy. Shyn­týaıtyna kelgende, Qazaqstannyń EQYU-na qatysýshy elder­diń senimine kirip, moıyndata bilýi, ashyq dıplomatııalyq tıimdiliktiń hres­tomatııalyq úlgisi boldy.