«Elbasy joldaýy - tikeleı efırde» - respýblıkalyq basylymdarǵa sholý

***

«Elbasy joldaýy - tikeleı efırde». Búgin qańtardyń 29-y saǵat 11.00-de respýblıkalyq telearnalarda Qazaqstan Respýblıkasynyń Prezıdenti N.Á.Nazarbaevtyń jyl saıynǵy Qazaqstan halqyna Joldaýy tikeleı efırde taratylady. «Egemen Qazaqstan» gazeti keshki ýaqytta barlyq telearnalarda qorytyndy jańalyqtardan keıin arnaıy reportajda Memleket basshysynyń sózi qaıtalap beriletinin habarlaıdy.

Osy habar «Aıqyn», «Kazahstanskaıa pravda», «Lıter», «Izvestııa-Kazahstan», «Ekspress-K» gazetterinde de jarııalanǵan.

Keshe «Izvestııa» gazetinde jáne «Interfaks» agenttiginiń saıtynda Qazaqstan Prezıdenti Nursultan Nazarbaevtyń «EQYU taǵdyry jáne perspektıvalary» degen taqyryppen maqalasy jarııalandy. «Egemen Qazaqstan» gazeti búgingi sanynda osy maqalanyń qazaqsha nusqasyn basyp otyr. «Eýropadaǵy qaýipsizdik jáne yntymaqtastyq jónindegi uıym (EQYU) sekildi osyndaı yqpaldy halyqaralyq uıymǵa tóraǵalyqtyń belsendi kezeńine kirise otyryp, men birqatar asa mańyzdy máselelerdi qozǵaǵym keler edi. Bul - EQYU-nyń budan árgi taǵdyry jáne perspektıvalary, onyń qalyptasatyn jańa álemdik tártiptegi orny. EQYU qazirgi turǵyda HHІ ǵasyrdyń serpindi naqtylyǵyna kirige ala ma? Bolashaq búginnen, sonyń ishinde EQYU-nyń qatysýymen jasalady. Óziniń aýqymdylyǵy men Vankýverden Vladıvostokqa deıingi alyp jatqan keńistigi týraly júıeli eske salyp turatyn uıym osy zamanǵy álemniń eń kúrdeli de ózekti problemalarymen aınalysýy tıis. EQYU-nyń is basyndaǵy tóraǵasy retindegi Qazaqstan istiń naq osyndaı túsinigin negizge alady. Biz EQYU qyzmetiniń barlyq máselelerin sheshý úshin jyldyq merzim jetkiliksiz ekenin aıqyn sezinemiz. Biz uıymdaǵy qandaı da bir tóńkeristerdiń jaqtaýshylary emespiz, biraq ta enjar áreket etpeıtinimiz de anyq», deıdi Memleket basshysy.

Bul maqala «Kazahstanskaıa pravda» gazetinde de jaryq kórdi.

«Egemen Qazaqstan» gazetiniń jazýynsha, EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev London qalasyna bardy. Onda ol Aýǵanstan máselelerine arnalǵan Syrtqy ister mınıstrleriniń konferentsııasyna qatysady. Basylymnyń jazýynsha, Q.Saýdabaev aýǵanstandyq stýdentterdi oqytyp, beıbit mamandar daıyndaýǵa Qazaqstannyń 50 mln. dollar bólgenin jáne EQYU-ǵa tóraǵalyq etý barysynda da osy tárizdes jobalardy qoldaýǵa Uıym tarapynan qarajat bóldirýge tyrysatynyn jarııalaǵan. Osy jaıt arqaý bolǵan maqala basylymnyń juma kúngi nómirinde «Qazaqstan tóraǵalyǵyna qyzyǵýshylyq zor» degen taqyryppen jarııalanǵan.

EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev sapary jaıynda «Kazahstanskaıa pravda», «Ekspress-K» basylymdary da jazǵan.

***

«Aıqyn» gazetiniń dástúrli «Aq sóıle!» aıdarynyń búgingi qonaǵy - QR Kúres federatsııasynyń prezıdenti, FILA senatory Bekzat Sarmanov. «Jeńispen órilgen dástúrdi jalǵastyrýǵa tıispiz» degen taqyryppen berilgen ekeýara áńgimeden kúres sportyndaǵy jetistikter jaıynda keńinen maǵlumat ala alasyzdar.

«Bilim salasyn bilikti mınıstr basqaryp otyr ma?». Osy taqyryppen «Aıqyn» gazetinde jarııalanǵan maqala Bilim jáne ǵylym mınıstrliginiń sońǵy jyldarda atqarǵan jumystaryna keńinen toqtalǵan. «Jalpy, jurttyń pikiri jaman emes, al bilikti mamandardyń baǵalaýynsha, bilim salasynyń tasy órge domalaǵan kez - mınıstrlikke Janseıit Túımebaevtyń kelýimen ushtasyp jatyr», dep jazady basylym.

«Aıqyn» gazetiniń jazýynsha, Ekibastuz qalasyndaǵy Lenın kóshesin qalalyq máslıhat depýtattary Máshhúr Júsip esimine aýystyrý týraly sheshim shyǵarǵan. Alaıda osy sheshimge qarsy bolǵandar da bar. Ol Sotsıalıstik eńbek eri, qalanyń baıyrǵy turǵyny Stanıslav Kýrjeı eken. «Qazaq dese kejegesi keri tartatyn bul «joldas» oblystyq, qalalyq basshylardyń atyna hat jazyp, keńestiń kezinen beri qalǵan kósemniń kóleńkege ketkenine qaıǵyryp júrgen kórinedi. Bul endi naǵyz shovınıstik kózqaras ekendiginde daý joq», dep jazady basylym. «Qazaq dese, Kýrjeıdiń kejegesi nege keıin tartady?» degen taqyryppen berilgen maqalaǵa naq osy jaıt arqaý bolǵan.

***

«Byltyrǵy sanaq naýqanynda kók moıynsaly taǵyp, kók sómke asynǵandar kóshe-kósheni aralap, kóp úıdi súzgiden ótkizgenimen, odan áli kúnge deıin súbeli nátıje shyqqan joq. Buny keshegi Senattyń kezekti otyrysyna kelgen Statıstıka agenttiginiń jańa tóraǵasy Álıhan Smaılov myrza da moıyndady. Memleket adam sanaýǵa kóshkende, sol jumysqa jaýapty laýazym ıeleri aqsha sanaýǵa kirisip, sonyń kesirinen naýqanǵa arnalǵan halyqtyń qarjysy hantalapaıǵa túsip, ulttyq sanaqqa bólingen 1 mlrd 144 mln teńgeniń 764, 8 mıllıony jylpos sheneýnikterdiń jemsaýynda ketken. Sanaq sharasyna tek 379 mln teńge ǵana jumsalypty. Keshe Senatqa kelgen Statıstıka agenttiginiń tóraǵasy Álıhan Smaılov qazaqtyń naqty sany týraly senatorlardyń suraǵyna suıyq jaýap qaıtardy. Sanymyz baıaǵy 16 mıllıon. Bas sanaqshy munyń sebebin agenttik basshylarynyń ústinen qylmystyq is qozǵalýyna baılanysty bolýymen túsindirdi», dep jazady «Alash aınasy» gazeti. Maqalany basylymnyń búgingi nómirinen «Sonymen qazaqtyń sany qansha boldy ózi?» degen taqyrypta oqı alasyzdar.

Senat qabyrǵasyndaǵy alqaly jıyn jaıynda «Egemen Qazaqstan», «Aıqyn», «Lıter» gazetteri de keńinen jazǵan.

Osy basylymnyń 1-shi betinde «Almaty Gaıtıdiń kebin kıip qalmasyn» degen dabyl qaǵarlyq maqala jarııalanǵan. Basylymnyń jazýynsha, Almatydaǵy ǵımarattardyń úshten biri seısmologııalyq talaptarǵa sáıkes kelmeıdi. Ońtústik astanada 9 baldyq zilzala bola qalsa, nysandardyń 30 paıyzdan astamy jermen-jeksen bolýy ábden múmkin. Bul týraly keshe Qazaq seısmologııalyq tózimdi qurylys jáne arhıtektýra jónindegi ǵylymı-zertteý ınstıtýtynyń dırektory Marat Áshimbaev málimdegen. Seısmolog mamandardyń aıtýynsha, qaladaǵy nysandardyń seısmıkalyq turaqtylyǵyn kúsheıtý jumystarymen aınalysatyn mekeme 2007 jyldan beri qarjy tapshylyǵyna ushyraǵan.

***

2010-ynshy jyldan bastap Qazaqstanda tuńǵysh ret jaldamaly úıler paıdalanýǵa beriledi. «Eger «áleýmettik» páter úshin tólem 62 400 myń teńge turady delik, sony 10%-ǵa kóbeıtemiz, bul - memlekettiń enshisine aýdarylar soma, sosyn ony 12 aıǵa bólemiz, sóıtip aı saıynǵy jaldaý tólemin shyǵaramyz. Al bul ár sharshy metrine shamamen 520 teńgeni quraıdy, oǵan kommýnaldyq qyzmet aqysy qosylady. Sonymen, bir bólmeli páter shamamen aıyna kem degende otyz myń teńgege (kommýnaldyq qyzmetti eseptemegende) baǵalansa, eń kóp degende - tórt bólmeli páter - shamamen 120 myń teńge turady eken. Sonymen birge bıznes-dárejeli páter jaldaýshysyna kem degende 90 myń teńge turady, eń qymbat degende - eki júz elý myń teńgeden artyp túsýi múmkin», dep jazady «Ekonomıka» gazeti.

«Budan buryndary da tilge tıek etip júrgenimizdeı, el Úkimeti sońǵy jyldary únemi nazarda ustap kele jatqan dilgir máselelerdiń biri - ıslamdyq qarjy júıesin ornyqtyrý bolyp tabylady», dep jazady «Ekonomıka» gazeti. Osyǵan oraı basylymda «Islam qarjygerleri - Astanada» degen taqyryppen maqala jarııalandy.