Elbasy Joldaýy eńbek adamynyń jaǵdaıyn sheshýge baǵyttalǵan - Baqytjan Ábdraıym

ASTANA. QazAqparat - Elbasy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýy eńbek adamynyń jaǵdaıyn sheshýge baǵyttalǵan. Mundaı pikirdi búgin atalǵan Joldaýdy talqylaýǵa arnalǵan jıynda QR Kásipodaqtar federatsııasynyń tóraǵasy Baqytjan Ábdiraıym bildirdi, dep habarlaıdy QazAqparat tilshisi.

«Elbasy Joldaýy eńbek adamyna, onyń múddesin, oıyn, jaǵdaıyn sheshýge, kóterýge arnalǵan. Bir ǵana mysal keltireıin. Eń tómengi jalaqyny 1,5 ese kóterý degendi qalaı túsýge bolady?. 1,3 mıllıon adam eń tómen jalaqy alady jáne olardyń barlyǵy tómengi deńgeıde qyzmet etedi. Máselen, aýrýhanadaǵy sanıtardyń, osy jerdiń eden jýatyn qyzmetkerdiń, arhıvarıýstyń, kýrerdiń jalaqysy tym tómen. Eger bir otbasynda 3 adam dep alatyn bolsaq, onda tómengi jalaqynyń 1,5 esege artýy 4 mıllıonǵa jýyq adamǵa tikeleı qatysty. Jalpy adamnyń áleýmettik jaǵdaıy men bedeli jalqysyna baılanysty. Jalaqysy joǵary bolsa, onda ózin jaqsy sezinedi, shyǵyndaryn óteı alady», - dedi Baqytjan Ábdiraıym.

Sonymen qatar ol eń tómengi jalaqy óskenimen ony alatyn adamdardyń tóleıtin salyqtary ne bári 1 paıyz bolyp qala beretindigin basa aıtty.

«Aıtalyq, 42 myń teńge alatyn bolsa, onda 1 paıyz ıaǵnı 420 teńge ǵana salyq tóleıdi. Degenmen, 20 paıyz salyq tóleıtin azamattarmen birdeı áleýmettik qoldaý syndy búkil júıege qatysady. Mine qarapaıym eńbek adamyna osyndaı aýqymdy qoldaý jasalyp otyr», - dedi ol.

Osy rette Kásipodaqtar federatsııasynyń tóraǵasy Elbasynyń eń tómengi jalaqyny kóterý bastamasyna jekemenshik kásiporyndar da qoldaý bildiretindigine senimdi ekenin aıtty.

«Bizde olardyń aldyna osyndaı másele qoıamyz. «Memleket tarapynan eń tómengi jalaqy kóterildi, Sizder odan da joǵary kóterińizder» dep mekeme basshylarynyń, qojaıyndarynyń aldyna másele qoıa bastaımyz jáne ony talap ta etemiz», - dedi federatsııa basshysy.