Elbasy Joldaýy bizdi rýhtandyrady - E. Jumádilov
QYZYLORDA. 10 aqpan. QazAqparat /Jańagúl Serdaly/ - Qyzylorda oblysy Shıeli aýdany Sulýtóbe aýylynyń turǵyny, zeınetker muǵalim Eráli Jumádilov QazAqparat tilshisine osyndaı pikirin bildirdi.
«Elbasymyzdyń Qazaqstan halqyna dástúrli Joldaýynyń elimizdiń táýelsizdiginiń 20 jyldyǵynda salmaǵy arta túsetini anyq, - dedi ol. - Onyń sarabdal saıasatynyń arqasynda 20 jyl ishinde ishinde Qazaqstan álemdegi damýshy memleketter qataryna qosyldy. San salany qamtyǵan Joldaýdyń arqasynda baǵyt-baǵdarymyz anyqtalyp, jaqsy nátıjelerge qol jetkizilýde. Prezıdent ustanǵan saıasattyń durystyǵyn halqymyz memleketimizdegi órkendi ózgerister arqyly kórip otyr».
Qart ustazdyń pikirinshe, Prezıdentimizdiń bıylǵy Joldaýy áleýmettik máselelerge, densaýlyq saqtaý, bilim berý, tilderdi damytý, halyqty taza aýyzsýmen qamtamasyz etý, turǵyn úı-kommýnaldyq sharýashylyq salalaryna arnalǵandyqtan, ózekti jaılarǵa jan-jaqty sholý jasap, aldaǵy maqsattarymyzdy aıqyn kórsetýmen erekshelenedi. Sonyń ishinde bilim sapasyn kóterip, muǵalim bedelin arttyrý, jalaqylaryn eseleı túsý sońǵy jyldary Elbasy Joldaýlarynda únemi aıtylyp keledi. Bul salada atqarylǵan sharalar jeterlik. El prezıdentiniń kóregen saıasatynyń arqasynda bilim qyzmetkerleriniń keshegiden búgini kóshilgeri. Elimizdegi bilim berý salasynyń baǵyt-baǵdaryn aıqyndaıtyn «Bilim berýdi damytýdyń 2011-2020 jyldarǵa arnalǵan memlekettik baǵdarlamasy» ótken jyly qabyldanǵany málim.
«Bul - ómirlik máni bar qujat. Búgingi tańda bilimniń memlekettiń áleýmettik-ekonomıkalyq damýynyń, sondaı-aq ınnovatsııalyq júıe men adamı kapıtaldyń basty faktoryna aınalǵanyn ómirdiń ózi dáleldep otyr, - dedi odan ári E.Jumádilov. - Elbasynyń ǵylym men ınnovatsııany ekinshi orynǵa qoıǵan el, eshqashan eshbir salada birinshi orynǵa kóterile almaıtyndyǵy týraly qaǵıdasyn basshylyqqa alǵan baǵdarlamanyń óń boıynan otandyq bilimdi damytýdyń órkenıetti joldaryn baıqaımyz».
Bizdiń suhbattasýshymyz memlekettik tildi meńgergen qazaqstandyqtar sany 95 paıyzǵa jetýi tıis ekenine de rıza bolypty. Sonymen qatar, alda orys tilin damytyp, jastarymyz úsh tildi erkin sóıleıtindeı dárejege jetý mindettelgeni de durys. Jyl ótken saıyn halqymyzdyń turmystyq deńgeıi kóterilip keledi. Árıne, munyń bári Elbasy júrgizgen saıasattyń arqasynda múmkin bolyp otyr.
«Memleket basshysy 2011 jyldy Qazaqstan Respýblıkasy Táýelsizdiginiń 20 jyldyǵyna baılanysty «Beıbitshilik pen jasampazdyqtyń 20 jyly» degen uranmen ótiledi deýi mereı tasytady. Biz de bul bastamany úlken júrekpen, ystyq yqylaspen qabyldadyq. Qazaqstan mereıi - bizdiń baqytymyz. Demek, baq pen baqyt ortaq, sondyqtan da bir kisideı eńbek etý, jas urpaqty adamı rýhta tárbıeleý kimge de bolsa paryz», - dedi ulaǵatty ustaz sóziniń sońynda.
