Elbasy Joldaýy álemdik BAQ betterinde
ASTANA. QazAqparat - Qazaqstan Respýblıkasynyń Prezıdenti Nursultan Nazarbaevtyń halyqqa arnaǵan kezekti Joldaýy jarııalanǵan kúninen álemniń alýan túrli aqparat quraldarynyń nazaryna ilinip, onyń túıindi tustary keńinen talqylaýǵa túsip jatyr. Álem jýrnalısteri sonyń ishinde Joldaýda kóterilgen memleket múlkin jappaı jekeshelendirý, teńgeniń ózgermeli baǵamy saıasaty kóbirek sóz etilýde. Biz búgin sol materıaldardyń negizinde jasalǵan kezekti toptamany oqyrman nazaryna usynamyz, dep jazady egemen.kz.
«Qazaqstan Prezıdenti Nursultan Nazarbaev óziniń dúısenbi kúni sóılegen sózinde óz úkimetiniń búkil memlekettik uıymdarǵa baǵyttalǵan jekeshelendirýdiń jańa baǵdarlamasyn jasaıtynyn málimdedi, dep habarlady QHR-dyń «Sınhýa» aqparattyq agenttigi.
«Bul qadam kúlli álemniń qarjy, kómirsýtegi, metall, azyq-túlik sekildi «barlyq derlik rynoktarynda» oryn alyp jatqan turaqsyzdyqtan shyǵyp otyr», dedi óziniń Joldaýynda Nazarbaev.
Nazarbaev álem rynoktarynyń ydyraýyna baılanysty paıda bolǵan birqatar syrtqy jaǵymsyz áreketterdiń yqpalyna ushyraǵan Qazaqstan ekonomıkasynyń turaqtylyǵy men ósimine qoldaý kórsetý úshin qazirgi zamanǵy reformalardyń keshendi qurylymyn júzege asyrýǵa shaqyrdy.
Prezıdent turaqty ekonomıkalyq ósimge jetýdi qamtamasyz etý úshin elde jappaı jekeshelendirý júrgizýdi jáne ishki resýrstardy qatarǵa qosý maqsatynda básekelestikti arttyrýdy usyndy. Osylaısha, ol quramyna jekeshelendirýge jatpaıtyn nysandar sanyn qysqartý men zańdardy qalyptastyrýdy engizetin, memlekettik sektorǵa baǵyttalǵan keń aýqymdy jekeshelendirý baǵdarlamasyn jasaýdy usyndy.
Nazarbaev sonymen birge, jekeshelendirý úderisiniń qazaqstandyq jáne sheteldik ınvestorlardyń barynsha kóptep qatysýlaryna múmkindik berý úshin ashyq jolmen jáne ádil naryqtyq baǵaǵa qurylǵan konkýrs negizinde júrgizilýleri kerek ekenin atap ótti», dep jazady qytaılyq BAQ.
«Qazaqstan munaı baǵasyna sáıkes teńgeniń ózgermeli baǵamy saıasatyn ustanatyn bolady, dep málimdedi Qazaqstan Prezıdenti Nursultan Nazarbaev dúısenbi kúni, dep habarlady amerıkalyq «CNBC» telearnasy.
«Ulttyq valıýta baǵamyn Ulttyq qordyń qarjylary esebinen óne boıy qoldaý praktıkasy endi bolmaıdy», dedi Nazarbaev óziniń Qazaqstan halqyna Joldaýynda memlekettik munaı qoryn ıshara ete otyryp.
Buryn teńgeni rezervtegi dollardy satý esebinen qoldap kelgen Qazaqstan Ulttyq banki tamyz aıynda teńgeniń 40 paıyzǵa ósýine jol bere otyryp, bul saıasattan bas tartty.
Nazarbaev, sondaı-aq, Ulttyq banktiń qaraýyndaǵy zeınetaqy aktıviniń 2016 jyly qazaqstandyq jeke tulǵalar men shetel kompanııalarynyń basqarýlaryna beriletinin atap ótti. Bul 2013 jylǵa deıin bolyp kelgen júıege qaıta kóshýdi bildiredi.
Zeınetaqy jınalymdarynyń tabystylyǵyn kóterý maqsatynda zeınetaqy qarjylaryn ınvestıtsııalaý jaıy qaıta qaralýy kerek. Endi Zeınetaqy qoryna da Ulttyq qor sııaqty qarap, basqarý kerek.
Prezıdent, sondaı-aq, eldiń bıýdjeti tepe-teńdigin ustap turý úshin Zeınetaqy qory aktıvterin tek memlekettiń ǵana paıdalana alatyn bolýy tıis ekenin aıtty. Ol úkimettiń «qyzmettik muqtajdyqtary» úshin de, memleket pen jeke kompanııalarǵa kredıt berý úshin de jaratylmaýy tıis. Nazarbaev salyq jınaý tártibin jónge keltirý maqsatynda úkimetke burynnan bar qosymsha qun salyǵynyń ornyna satýdan túsetin salyqty engizýdi tapsyrdy. Biraq, onyń protsenttik ólshemi qandaı bolatyny aıtylǵan joq», delingen amerıkalyq BAQ-ta.
Qazaqstan Prezıdenti Nursultan Nazarbaev Qazaqstan halqyna arnaǵan keshegi Joldaýyn búkil memlekettik uıymdardyń basyn qamtıtyn jekeshelendirýdiń jańa baǵdarlamasy júretinin jarııalaý úshin paıdalandy, dep habarlady eurasianbusinessbriefing.com agenttigi.
«Memlekettik sektordyń quramynda jeti myńnan astam kásiporyn bar», degen Prezıdent Qazaqstannyń ónerkásibi men aýyl sharýashylyǵy aktıvteri úshin jaýap beretin «Samuryq-Qazyna» jáne «QazAgro» sekildi holdıngterdiń tıimdiligi tómen jumystaryn synǵa aldy.
Prezıdenttiń aıtýynsha, jekeshelendirýdiń jańa baǵdarlamasy onyń naryqtyq quny ádil bolyp, ashyq jáne básekelestik sıpatynda júrgizilgende ǵana tabysty bolmaq.
Baǵdarlama qazaqstandyq jáne sheteldik ınvestorlardyń qatysa alýlary úshin ashyq ótkiziledi.
Memleket basshysynyń aıtýynsha, atalǵan baǵdarlama munaıdyń álemdik baǵasynyń kúrt qulaýyna qaıtarylǵan ishinara jaýap bolyp tabylady. Ol munaı baǵasynyń qulaýynan bıýdjettik quıylymy 20 paıyzǵa jýyq túsip ketken Qazaqstan ekonomıkasyn qorǵaýǵa baǵyttalady.
«Qosymsha qun salyǵy tóleý kólemi tórtten birge, al tabystyń korporatıvtik salyǵy 13 paıyzǵa tómendedi. Salyqty kótere túsý - qalyptasqan jaǵdaıdan shyǵýdyń joly emes. Bul tek bızneske qosymsha qysymdy bildiredi», - dedi Nazarbaev.
Nazarbaev Ortalyq Azııanyń munaıǵa baı elderiniń aktıvteri úkimettiń «qyzmettik muqtajdyqtary» men memlekettik nemese jeke kompanııalarǵa nesıe berý úshin emes, tek qana memlekettiń menshigine paıdalanylýy tıis, dep málimdedi. Nazarbaev salyq tártibin retke keltirý maqsatynda úkimetke qolda bar qosymsha qun salyǵynyń ornyna satý salyǵyn engizýdi tapsyrdy. Ol «Samuryq-Qazyna» sııaqty memlekettik holdıngterdiń kúrdeli qurylymdaryn jekeshelendirýden keıin jınaqy uıymdar etip shyǵarýǵa tapsyrma berdi. Biraq, kompanııalar attaryn naqtylap atap bergen joq, dep jazady malaızııalyq therakyatpost.com agenttigi.
Al, «Finansial Times» basylymy «Budan bir aı buryn Ulttyq bank tóraǵasyn ornynan alyp tastaǵan Nazarbaev óziniń dúısenbi kúngi Qazaqstan halqyna Joldaýynda memleket qarjysynyń budan bylaı ulttyq valıýtaǵa qoldaý kórsetý úshin jumsalmaıtynyn aıtyp, Ulttyq banktiń «ınstıtýttyq kemshilikterin» synǵa aldy» dep jazdy.
