Elbasy Joldaýda daǵdarysqa qarsy is-sharalardy kórsetip, halyqtyń jaǵdaıyn jaqsartýdyń jolyn aıqyndap berdi - Bostandyq aýdanynyń ákimi
ALMATY. Aqpannyń 4-i. QazAqparat /Erbol Azanbek/ - Búgin Almatydaǵy Bostandyq aýdany ákimdiginde aýdan aktıviniń jınalysy ótip, Elbasynyń Joldaýyn talqylady,
dep habarlaıdy QazAqparat.
Jıynǵa aýdandaǵy memlekettik qurylymdardyń basshylary men kásipkerler, qoǵamdyq uıymdardyń ókilderi, aýdan turǵyndary qatysty. Aýdan ákimi Záýresh Amanjolovanyń aıtýynsha, Elbasynyń kezekti Joldaýy jetken jetistikterimizdi oı órisinen ótkizip, bolashaqty aıqyndaýǵa, aldymyzǵa qoıǵan mindetterdi iske asyrýǵa baǵyttalyp otyr. «Elbasy Joldaýda daǵdarysqa qarsy qoldanylǵan is-sharalardy kórsetip, halyqtyń jaǵdaıyn jaqsartýdyń jolyn aıqyndap berdi», dedi aýdan ákimi.
Onyń aıtýynsha, aýdan Joldaýda kórsetilgen mindetter údesinen shyǵýǵa daıyn. «Bıylǵy jyly «Bıznestiń jol kartasy-2010» baǵdarlamasy aıasynda aýdan boıynsha 8 myń adamdy turaqty jumyspen qamtamasyz etý úshin 3 mıllıard 88 mıllıon 112 myń teńge bólindi. Bunymen qatar 500-ge jýyq adam áleýmettik jumyspen, jastar tájirıbesi boıynsha 300 joǵary oqý ornyn bitirýshi qamtylady.Sondaı-aq 623 mıllıon teńgege 3 mektep, 251 mıllıon teńgege 6 densaýlyq saqtaý oryndary jóndeýden ótedi. Elbasy tapsyrmasyna sáıkes 4 otbasylyq balabaqsha ashylyp, jekemenshikke ótip ketken 3 balabaqsha ǵımaratyn memleketke qaıtarý kózdelip otyr. Buǵan qosa 5 mektepte mektepke deıingi daıyndyq toptaryn uıymdastyrý kózdelip otyr», deıdi Z.Amanjolova.
Jınalys barysynda Elbasy Joldaýy aýdan turǵyndary tarapynan qyzý qoldaý tapty. «Elbasy Joldaýyndaǵy mindetterdi júzege asyrý búkilhalyqtyq qoldaýǵa ıe bolýy tıis», deıdi jınalysqa qatysqandar.
