Elbasy jetim-balalardy Jańa jyl merekesimen quttyqtady
ASTANA. 26 jeltoqsan. QazAqparat - Elordadaǵy Oqýshylar saraıynda Qazaqstan Prezıdentiniń atynan ata-ananyń qamqorlyǵynsyz qalǵan balalarǵa arnalǵan dástúrli Jańajyldyq shyrsha merekesi ótti.
Elbasy Nursultan Nazarbaev balalardy kele jatqan Jańa jyl merekesimen beınejoldaý arqyly quttyqtady.
"Qymbatty balalar! Búgin baıtaq elimizdiń barlyq óńirlerinde ónegeli balalar Jańajyldyq shyrshanyń aınalasyna jınaldy. Jańa jyl eń aldymen, balalar men búldirshinderge qýanysh syılaıtyn mereke. Men senderdi sender arqyly barsha qazaqstandyq balalardy kele jatqan Jańa jylmenen quttyqtaımyn! Táýelsizdik arqyly bizdiń uly Otanymyz jyldan jylǵa órkendeı túsýde. Qazir dúnıejúzi Qazaq elin qurmetteıdi. Sender osyndaı erekshe elde ósip kele jatqan baqytty urpaqsyńdar. Ata-analaryńdy qýantyńdar, zerdeli de zerek, bilimdi de bilikti bolyńdar! Buǵan elimizde barlyq múmkindik bar. Jasampaz isterdiń barlyǵy senderdiń jarqyn bolashaqtaryń úshin jasalýda. Barlyq óńirlerde jańa mektepter salynýda, ıntellektýaldy mektepterdiń qatary arta túsýde. Sender mektep bitirgennen soń jaqsy bilim alýlaryń úshin Astanada halyqaralyq deńgeıdegi ýnıversıtet ashtyq. "Ónerli - órge júzedi", degen dana halyq. Óner - bilimniń keni. Órkendi eldiń keni bolyńdar. Aınalasyn altyn araıǵa bólegen jasyl shyrsha bazarly balalyqtyń belgisi. Shyraıyn bermeıtin osy shyrshadaı jaınap óse berińder! Bolashaqtaryń baıandy bolsyn!", - dedi Memleket basshysy.
Qyzyldy-jasyldy shamdary jarqyldaǵan, ádemi bezendirilgen alyp shyrshanyń mańyna toptasqan balalar Aıaz Atany erekshe yqylaspen qarsy aldy. Merekeniń bas keıipkeri búldirshinderdi Jańa jylmen quttyqtap, jyly lebizderin bildirdi. Budan soń balalar bir-biriniń qoldaryn ustap, shyrshany aınalyp án saldy, áýen yrǵaǵymen bıledi. Budan keıin kóńildi top Jańa jyl «ıesi» - Jylandy qoshemetpen qarsy aldy.
Mereke sońynda balalarǵa Elbasy atynan syılyqqa planshetter, «tátti» syılyqtar men jumsaq oıynshyqtar tabys etildi. Osy jerde balalarmen birge sharaǵa qatysqan Astana qalasy ákiminiń orynbasary Aıda Balaeva, Jańajyldyq shyrshaǵa balalar úılerinen 200-ge jýyq tárbıelenýshiniń qatysqanyn, mundaı merekelik is-shara Jańa jylǵa deıin qalanyń ár jerinde jalǵasatynyn aıtty.
