«Elbasy jaıly fılm jalǵasady» - respýblıkalyq basylymdarǵa sholý

ASTANA. 20 sáýir. QazAqparat - Qazaq aqparat agenttigi respýblıkalyq basylymdarda 20 sáýir, juma kúni shyqqan ózekti materıaldarǵa sholýdy usynady.

***

Alda kele jatqan Álemdik jáne dástúrli dinder kóshbasshylarynyń IV sezi qarsańynda Qazaqstan musylmandary dinı basqarmasynyń tóraǵasy, Bas múftı, sheıh Ábsattar qajy Derbisáli «Egemen Qazaqstan» gazetine «Islam - adamzattyń asyl táji» degen taqyryppen suhbat bergen. Áńgime barysynda barlyq saýaldarǵa tuşymdy jaýap bergen Bas múftı: «Aǵymdar jaıly aıtqanda, onyń shyǵý tórkini men tarıhyna toqtalǵan durys. Osy máseleni jiti zerttegen ǵalymdardyń pikirinshe, HVІІІ ǵasyrda Nejd ólkesinde dúnıege kelgen Muhammed ıbn Abd ál-Ýahhab negizin qalanǵan dinı-saıası aǵym onyń atymen «ýahhabılik» dep atalǵan. Ýahhabılik ıdeologııa ókilderi ózderin  «salafımiz» dep ataǵandyqtan osy atpen tanyla bastaıdy. «Salaf» sózi Qasıetti Qurannyń birneshe jerinde kezdeskenimen, ol «aldyńǵy ótkender», «buryn­ǵylar» degen maǵynany bildiredi. Sondyqtan salafı musylmandardyń aldyńǵy úsh tol­qynyna berilgen ataý. Olar Paıǵambarymyzdyń (s.ǵ.s.) sahabalary, tabıǵınder (sahabalardy kórgender) men tabaǵa tabıǵınder (tabıǵınderdi kórgender). Zamanymyzda ózderin «salafı» sanaýshylar Islamnyń áýelgi úsh ǵasyryndaǵy ómir súrgenderge teńeýde. Burynǵy salafıler shynaıy ıslam jolyn ustanýshylar bolsa, qazirgiler olaı emes», - deıdi.

 

«Bıyl Qazaqstannyń iri óner­kásip oryndarynyń qataryn­da­ǵy «Qaınar AKB» jaýap­ker­shi­li­gi shekteýli seriktestigi Qytaıǵa 1 mln. akkýmýlıator batareıasyn jó­neltýdi josparlasa, ótken seı­sen­bi kúni Taldyqorǵanda or­nalasqan zaýyttaǵy 18 myń dana ónimniń alǵashqy toptamasy júk vagondaryna tıelip, saparǵa shyqty», - dep jazady «Egemen Qazaqstan» gazeti búgingi nómirindegi «Qaınardyń» akkýmýlıatory Qytaıǵa jóneltildi» degen taqyryptaǵy maqalasynda. Basylymnyń atap ótýinshe, Qytaı rynogyna shyǵý «Qaı­nar AKB» kásipornynyń eksport kólemin jylyna 700 myńnan 2 mln. dana akkýmýlıatorǵa, al ón­di­ris­tik qýatyn jylyna 1 mln.-nan 3 mln. batareıaǵa deıin art­tyrýǵa múmkindik berse, ju­mys­shylar sany myń jarym adamǵa kóbeıedi.

***

«Alash aınasy» gazetiniń turaqty «Dat!» aıdarynda QR Qarýly Kúshteri Qurlyq áskerleriniń bas qolbasshysy, general-leıtenant Murat Maıkeevpen aradaǵy suhbat «QR Qarýly Kúshterin qurý men damytýdy tolyq saralaý - tarıhshylar enshisinde» degen taqyryppen berilgen. Basylym tilshisiniń barlyq saýalyna egjeı-tegjeıli jaýap bergen ol: «Eń mańyzdysy - jańa egemen memlekettiń jas armııasy óziniń alǵashqy kúnderinen bastap-aq Elbasynyń dana basshylyǵynyń arqasynda barlyq qıynshylyqtardy eńsere bildi. Onyń ishinde ofıtserlik quramnyń jappaı ketýin, qarý-jaraq pen áskerı tehnıkanyń jańa túrlerimen jaraqtaýdyń bolmaýyn, ınfraqurylym obektileriniń buzylýyn, áskerı qyzmet mártebesiniń eń tómengi deńgeıge deıin quldyraýyn, jasaqtaýdaǵy, jaýyngerlik jáne jumyldyrý daıarlyǵynyń, áskerlerdi jan-jaqty qamtamasyz etýdegi problemalardy jeńip shyǵa aldy», - deıdi ol.

 

«Jylda Naýryz merekesiniń qarsańynda sporttyń ár túrinen Ulystyń uly kúnine arnalǵan týrnırler kóbeıip ketedi. Respýbılkalyq kólemdegi taekvondo, fýtbol dodalaryn aıtpaǵannyń ózinde aýyl-aımaqtardyń ózderinde de osyndaı týrnırler kóptep ótkizilip jatady. Álbette buǵan qarsy shyqqaly otyrǵan joqpyz. Degenmen ózderińiz oılańyzdarshy, atam qazaq Ulystyń uly kúnin osyndaı sport túrlerimen qarsy alǵan ba? Nege osy ataýly meıramdy paıdalanyp, ózimizdiń ulttyq oıyndarymyzdy ulyqtap qalmasqa», - dep jazady «Alash aınasy» gazeti. Maqala «Ulttyq oıyndarymyzdy ulyqtaıyq» degen taqyryppen berilgen.

***

«Kópserııaly «Kóshbasshy joly»  kınoepopeıasyn túsirý jumystary jalǵasýda. Sháken Aımanov atyndaǵy «Qazaqfılm» aktsıonerlik qoǵamy «Báıterek» prodıýserlik ortalyǵymen birlesip, Mádenıet jáne aqparat mınıstrliginiń tapsyrysy boıynsha Temirtaý men Qaraǵandy qalasynda Prezıdent týraly fılm túsirýge kiristi», - dep jazady «Aıqyn» gazeti «Elbasy jaıly fılm jalǵasady» degen taqyryptaǵy maqalasynda. Basylymǵa bul jaıynda jobanyń úılestirýshisi Raıa Aıdynǵalıeva málim etken. Fılmniń birinshi bólimi ótken jyly úlken ekranǵa jol tartqan bolatyn. Al bıyl qoıýshy-rejısser Rústem Ábdirashev osy fılmniń «Otty ózen» atty ekinshi bólimi men «Temirtaý» degen atpen úshinshi bólimin túsirip jatyr eken. Olar kelesi jyly tolyqtaı túsirilip bitpek.

 

«Aıqyn» gazetiniń jazýynsha, Qyrǵyzstan Premer-Mınıstri Ómirbek Babanov segiz jasar manasshy Sezım Dıldedosovty qabyldapty. Oǵan balanyń jazǵan haty sebep bolǵan. Ol Premer-Mınıstrge óz otbasy, mektebi týraly syr shertip, álemge áıgili Manas jyryn qazirgi urpaqqa jetkizip júrgenin maqtanyshpen jazǵan.

«Kazahstanskaıa pravda» gazetiniń jazýynsha, keshe Ulttyq qaýipsizdik komıtetinde QR Parlamenti Májilisi Halyqaralyq ister, qorǵanys jáne qaýipsizdik komıtetiniń kóshpeli otyrysy bolyp ótti.  Otyrys barysynda ulttyq qaýipsizdikti qamtamasyz etý jáne Qazaqstan Respýblıkasy Prezıdenti N.­Á.Na­zar­baevtyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Jol­daýynda belgilengen mindetterdi oryndaý máse­leleri qaraldy. Ulttyq qaýipsizdik komıtetiniń tóraǵasy Nurtaı Ábiqaev depýtattardy zamanaýı qaýip-qaterlerge qarsy áreket etý, ekonomıkalyq jáne aqparattyq qaýipsizdikti qorǵaý, memlekettik shekarany kúzetý salasyndaǵy basym mindetter týraly aqparattandyrdy.