Elbasy: Jastar Táýelsizdiktiń qadirin biler dep senemin
«Endigi jyldy «Jastar jyly» dep jarııaladyq. Ol týrasynda arnaıy baǵdarlama qabyldaý kerek. Jastarǵa ne kerek - birinshi bilim, ekinshiden úılenetin bolsa úı-jaı qajet. Jaǵdaı jasalyp, jumys berilýi tıis. Tórt nárse. Sodan keıin bizde «Aýyl - el besigi», «Jasyl el», «Patrıottyq sarbaz» degen baǵdarlama bar. Olarǵa arnaıy jaǵdaı jasap, jastardyń qabiletin kóterýimiz kerek. Ásirese, jasalyp jatqan sharýany, Qazaqstannyń Táýelsizdigin (jastar - avt.) qadirleıtin bolar dep oılaımyn. Soǵan senemin», - dedi Nursultan Nazarbaev.
Elbasynyń aıtýynsha, endigi jastar Qazaqstannyń Táýelsizdigin saqtap qalýǵa umtylmasa - elimizdiń bolashaǵy bulyńǵyr bolady.
«Sol úshin balabaqsha, mektepten bastap patrıottyq tárbıe kerek. Bilim boıynsha az sharýa jasalǵan joq. Táýelsizdik alǵan jyldan beri 1500 mektep salynǵan. Balabaqshamen qamtýdy 36-dan 95 paıyzǵa deıin jetkizdik. Bul - óte úlken jetistik. Dál sol jerden bastap balanyń bilim joly bastalady. Sondyqtan, «Jastar jyly» bárimiz birigip jumys isteıtin bolamyz. Endigi jyldyń basynda sol másele jóninde jınalys bolady. Jastarmen aqyldasamyz. Ár óńirde memleket tarapynan jasalyp jatqan sharýa kóp. Jataqhana, grant degen jastardiki», - dedi Nursultan Nazarbaev.
Memleket basshysy óz sózinde elde jasalyp jatqan eńbekterdiń bári de bolashaq urpaqtyń qamy úshin atqarylyp jatqanyn sóz etti.
Eske sala ketsek, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn. Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn.
Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.
