Elbasy jastar máselesin eshqashan da nazardan tys qaldyrmaıdy - jas maman pikiri
Y. Qarashanyń 13-i. QazAqparat /Erbol Azanbek/ - Elbasy jastar máselesin eshqashan da nazardan tys qaldyrmaǵan. Búgingi halyqpen tikeleı efır arqyly júzdesýi barysynda da Elbasy jastar máselesine toqtalyp ótti.
Bul pikirdi Ál-Farabı atyndaǵy QazUÝ-dyń qyzmetkeri Áıgerim Álimjan aıtty. Jas mamannyń aıtýynsha, Elbasynyń memlekettik granttardyń muǵalimderge berilýi kerek degen sózi kóńilge qonymdy.
«Búgingi tikeleı efır barysynda Elbasynyń memlekettik granttardyń muǵalimderge berilýi kerek degen sózi kóńilime jaqty. Óıtkeni, ózim Ál-Farabı atyndaǵy QazUÝ-dyń fılologııa fakýltetiniń túlegimin. Muǵalimder eshqashan da elimizde jumyssyz qalǵan emes. Olarǵa qoǵamda suranys ta artyp otyr. Degenmen, keıbir pedagogıkalyq mamandyqtarǵa tapsyratyn talapkerler azaıyp ketkeni shyndyq. Máselen tarıh, pedagogıka sııaqty salalarǵa óz erikterimen oqýǵa túsetinder az. Shyn máninde jastar bilimdi de bilikti, búgingi zaman talaptaryna saı shyńdalatyn bolsa, jumyssyz qalmaıdy dep oılaımyn. Eń bolmaǵanda, óziniń jeke bıznesin ashyp, jeke jobalaryn jasaıdy», deıdi Á.Álimjan.
Onyń aıtýynsha, Elbasynyń elimizdegi ýnıversıtetter janynan ashylǵan zerthanalar barlyq zertteýshiler úshin qashanda ashyq bolýy tıis degen pikiri Elbasynyń joǵary bilim berý oshaqtaryna kóńil aýdaryp, únemi nazarda ustaıtynyn kórsetedi.
«El Prezıdentiniń bundaı saıasaty jastardyń bilimge umtylyp, el ekonomıkasynyń damýyna úles qosýyna, bolashaqqa úlken úmitpen qadam basýyna kómektesedi. Jastar da óz tarapynan Elbasynyń árbir qadamyn qoldaýy tıis», deıdi Á.Álimjan.
