Elbasy jas ofıtserlerge ásker qataryndaǵy sarbazdarǵa qamqorlyq jasaýdy tapsyrdy

ASTANA. 5 shilde. QazAqparat - Elbasy Nursultan Nazarbaev jas ofıtserlerge ásker qataryndaǵy sarbazdarǵa qamqorlyq jasaýdy tapsyrdy.

Prezıdent bul jaıynda búgin Astanada Qazaqstannyń Memlekettik týyn kóterý dástúrli rásimi men eldiń joǵary áskerı oqý oryndarynyń eń úzdik túlekterine ofıtser shenin tapsyrý kezinde aıtty.

«Ómirlerińde ofıtserlik shen alyp, aldaryńa úlken maqsatty qoıyp, áskerı maman bolýǵa bekindińder. Árqashan da aman-esen bolyńdar, elimizde beıbitshilik bolsyn. Esh ýaqytta soǵysqa qatyspańdar, biraq árqashan da Otandy qorǵaýǵa daıyn bolyńdar»,-dedi Memleket basshysy

«Áskerde ózderiń sııaqty jas jigitterge aǵa bolyp, qoldaý kórsetińder. Olardyń barlyǵy qazaqstandyqtardyń uldary. Solarǵa muqııat qarap, týǵan aǵadaı bolyp, sarbazdarǵa bar kóńilderińmen qarap, qamqorlyq jasańdar. Sonda bizdiń áskerimiz myqty bolady»,-dep túıdi N. Nazarbaev.