Elbasy: Jańǵyrýdyń mánin elge jete túsindirý - basty mindetterdiń qatarynda
ASTANA. QazAqparat - Bastalǵan keleli isterdi ary qaraı da zańnamalyq qamtamasyz etý qajet. Búgin altynshy saılanǵan QR Parlamentiniń úshinshi sessııasyn ashý barysynda sóz sóılegen QR Prezıdenti Nursultan Nazarbaev osylaı málim etti, dep habarlaıdy QazAqparat.
«Úshinshi sessııada osy jaqsy úrdisterdi jalǵastyryp, qarqyndy ári sapaly jumys isteýimiz kerek. Aldymyzda talaı súbeli sharýalar tur. Bastalǵan keleli isterdi ary qaraı da zańnamalyq qamtamasyz etý qajet. Sondaı-aq jan-jaqty jańǵyrýdyń máni men maqsatyn elge jete túsindirip, oǵan halyqty jumyldyrý da basty mindetterdiń qatarynda. Depýtattar ózge bılik tarmaqtarymen jáne halyqpen tyǵyz jumys istep, el senimin aqtaıtynyna kámil senemin»,-dedi Prezıdent.
Sonymen qatar, Memleket basshysy ótken ekinshi sessııada QR Parlamenti aýqymdy sharalardy júzege asyrǵanyn atap ótti.
«Eldegi turaqtylyq pen tynyshtyqtyń, tatýlyq pen birliktiń arqasynda dáıekti túrde barlyq bıikterdi baǵyndyryp kelemiz. Bolashaqta da birligimizdi saqtaıtyn bolsaq, alatyn belesterimiz áli de kóp, sondyqtan barlyǵyna qolymyz jetedi dep senemin. Kózdelgen jumystardyń qarqyndy ári júıeli atqarylýyna Parlamenttiń de qosqan úlesi zor. Ótken sessııada jemisti jumys jasaldy, qorytyndy jasaǵan kezde onyń barlyǵyn aıttyńyzdar. Parlament qorjynyndaǵy 111 zań jobasynyń 84-i qaralyp, qabyldandy. Qazir olar kúshine enip, elimizdiń ıgiligine qyzmet etip jatyr. Olardyń qatarynda «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» Zań eń negizgi, biz úshin qajetti ári mańyzdy ekenin bilesizder. Depýtattardyń da belsendiligi joǵary deńgeıde. Sizderdiń bastamalaryńyzben bir jylda 15 zań jobasy daıyndaldy, 17 Úkimet saǵaty men 7 parlamenttik tyńdaý aıasynda bılik tarmaqtarymen mańyzdy máseleler boıynsha tyǵyz baılanysta jumys isteldi», - dedi N.Nazarbaev.
