Elbasy volonter stýdentterdiń shákirtaqysyn ósirýdi tapsyrdy - Jastar jyly
«Táýelsizdik alǵan jyldan beri bizdiń elimizde 2,8 mln maman joǵary bilim alyp shyqqan. Eger 1991 jyly joǵary bilimi bar adamdardyń sany bizde 42 myń bolsa, 2018 jyly bul san 151 myń adamǵa jetken. Amerıkada halyqtyń jartysynyń joǵary bilimi bar dep aıtyp jatady. Al bizde ondaı sapa joq. Álbette, bizge joǵary bilim degende dıplomdy qaltaǵa salyp alý emes, sapaǵa mán berý kerek. Jumysqa kelgen kezińde shamańnyń qandaı ekeni baıqalady», - dedi Memleket basshysy Astanada ótip jatqan «Táýelsizdiktiń urpaqtary» atty Jastar jylynyń ashylý saltanatynda.
Memleket basshysy óz sózinde halyqtyń jalpy bilimdi bolǵanyn maqtanyshpen aıtýǵa bolatynyn atap ótti.
«Osyǵan baılanysty joǵary bilimniń qoljetimdiligin arttyrý, stýdentterdiń ómirin jaqsartý maqsatynda birshama jumystar atqarylyp jatyr. Bes áleýmettik bastamamda 2018-2019 jyly 20 myń granttyń bólinetinin aıtqanym esterińizde bolar. Sonymen birge, 2020 jylǵa deıin 70 myń oryndyq jańa jataqhana salýdy maqsat ettik. Aldymen, JOO-lardy, sodan keıin kolledjderdi jataqhanamen qamtý kerek», - dedi Elbasy.
Memleket basshysy óz sózinde osy ıgi jumystar jastarǵa tezirek eńbek naryǵyna beıimdelýge jol ashatynyn atap ótti.
«Halyqaralyq baǵalaý boıynsha, álemniń eń iri 300 kompanııasy qyzmetkerleriniń úshten biri apta saıyn eriktilikke bir saǵat bóledi. Biz ol týraly tipti oılamadyq. Osy baǵytta arnaıy jumys isteý kerek. Sondyqtan, Úkimet eriktilikpen aınalysatyn JOO-lardaǵy oqyǵandardyń shákirtaqysyn shamamen 30 paıyzǵa arttyrý baǵytynda jumys isteýi kerek. Biz buny jasaı alamyz. Bul baǵyttaǵy jumys stýdentterge arnaıy kómek bolsa, halyq úshin de paıdaly bolady», - dedi Elbasy.
Aıta ketsek, Jastar jylynyń ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler kelgen.
Eske sala ketsek, QR Prezıdenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn.
Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.
