Elbasy Vladımır Pýtınge kóńil aıtý jedelhatyn joldady
NUR-SULTAN. QazAqparat - Qazaqstannyń Tuńǵysh Prezıdenti Nursultan Nazarbaev Reseı Federatsııasynyń Prezıdenti Vladımır Pýtınge kóńil aıtý jedelhatyn joldady. Bul týraly Qazaqstan Respýblıkasynyń Tuńǵysh Prezıdenti - Elbasynyń Baspasóz qyzmeti habarlaıdy.
Elbasy Nursultan Nazarbaev Sheremetevo áýejaıynda jolaýshylar ushaǵynyń órtenýi saldarynan adamdardyń qaza bolǵany týraly habardy zor kúızelispen qabyldady.
«Qaza bolǵandardyń týystary men jaqyndaryna, sondaı-aq búkil Reseı halqyna kóńil aıtamyn. Zardap shekkenderdiń tezirek saýyǵyp ketýine tilektestik bildiremin», - delingen jedelhatta.
Reseıdiń Sheremetevo áýejaıynda bolǵan ushaq apaty jóninde buǵan deıin habarlaǵan bolatynbyz. Órtengen Sukhoi Superjet 100 ushaǵynyń bortynda bolǵan 78 adamnyń 37-si ǵana aman qaldy. QR SІM zardap shekken jáne qurban bolǵandar arasynda qazaqstandyqtardyń bar-joǵyn tekserip jatyr.
QR Indýstrııa jáne ınfraqurylymdyq damý mınıstri Roman Sklıardyń aıtýynsha, Qazaqstanda Reseıde óndirilgen «SSJ-100» markaly bir ǵana bıznes ushaq paıdalanylady.
«Bul ushaq jekemenshik kompanııaǵa tirkelgen. Al turaqty baǵdarlarda bizde osy tıptegi áýe kemesi paıdalanylyp júrgen joq», - dedi mınıstr.
Qazaqstan Prezıdenti Qasym-Jomart Toqaev pen Premer-Mınıstr Asqar Mamın apatqa baılanysty kóńil aıtty.
