Elbasy Varshavadaǵy forýmda sheteldik ınvestorlardy Qazaqstandaǵy jekeshelendirýge qatysýǵa shaqyrdy
VARShAVA. QazAqparat - Memleket basshysy Nursultan Nazarbaev búgin Varshavada ótken Qazaqstan-Polsha bıznes-forýmynda sheteldik ınvestorlardy Qazaqstanda júrgizilip jatqan memlekettik nysandardy jekeshelendirýdiń aýqymdy naýqanyna qatysýǵa shaqyrdy. Sonymen qatar, Elbasy sheteldik kompanııalarǵa memleketpen birlese atqarylatyn jobalarǵa qatysýdy usyndy.
«Qazaqstan ekonomıkalyq yntymaqtastyq jáne damý uıymy elderiniń tájirıbesi boıynsha memlekettiń ekonomıkaǵa qatysý úlesin 15% deıin qysqartýǵa múddeli. Osy maqsatta biz jekeshelendirýdiń aýqymdy naýqanyn bastaǵan bolatynbyz. Jeke sektorǵa satý úshin ekonomıkanyń túrli salalarynan 800-ge tarta kásiporyn satylymǵa shyǵaryldy. Olardyń arasynda munaı óńdeý, energetıka, ınfraqurylymdyq nysandar sekildi jobalar da bar», - dedi bıznes-forýmda sóz sóılegen Elbasy N. Nazarbaev.
Prezıdent sonymen qatar, tikeleı jekeshelendirýden bólek, Qazaqstannyń memlekettik-jekeshelik áriptestik qaǵıdaty boıynsha da yntymaqtastyqqa daıyn ekenin málimdedi.
«Biz ınvestıtsııalyq sala boıynsha memleket pen bıznestiń uzaq merzimdi ózara árekettestiginiń barlyq aspektilerin keshendi retteýdi qamtamasyz etetin jańa zań qabyldadyq. Memlekettik-jekeshelik áriptestik qaǵıdattary boıynsha Turǵyn úı kommýnaldyq sharýashylyq, densaýlyq saqtaý, avtokólik jáni temir jol qurylystary jáne taǵy basqa da salalarda aýqymdy jobalar júzege asatyn bolady. Osyǵan biz polsha kompanııalaryn belsendi qatysýǵa shaqyramyz», - dedi Prezıdent N. Nazarbaev.
Eske sala keteıik, 22-23 tamyzda QR Prezıdenti Nursultan Nazarbaev Prezıdent Andjeı Dýdanyń shaqyrtýymen Polshaǵa memlekettik saparmen kelgen bolatyn. Eki eldiń bıznes máselelerindegi yntymaqtastyqqa arnalǵan forýmǵa 400-den astam kásipkerler qatysty.
