Elbasy usynysy jastardy jarqyn isterge jeteleıdi - Erǵazy Manapuly

JARKENT. QazAqparat - Elbasymyzdyń 2019 jyldy «Jastar jyly» dep ataý jónindegi usynysynyń mán-mańyzyn jete túsinip, jan jaqty qarastyrǵanymyz jón. Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyna oraı óz oıyn bildirgen Qazaqstan Jazýshylar jáne Jýrnalıster odaǵynyń múshesi, aqyn Erǵazy Manapuly osylaı aıtty, - dep habarlaıdy QazAqparat.

Erǵazy Manapulynyń aıtýynsha, qazir jastardyń basty məselesi - baspana. Jastardyń jigermen jumys istep, jasyndaı jarqyldaıtyn keziniń kóbi kúndelikti kúıbeń tirliktiń shylaýynda ketken. «Mundaı jaǵdaıdy ultymyzdyń talaı-talaı ulandary amalsyz bastan keshkenine esh kúmánim joq», - deıdi ol.

Onyń oıynsha, jastar memleket múmkindik berip turǵanda qapy qalmaý qajet.

«Tıisti organdar «Jastar jyly» aıasynda keshendi baǵdarlama jasap, talapker ul-qyzdarymyzdy oqytý, oqý bitirgenderin jumyspen qamtý, tabysty kásipke baýlý, daryndy jastardy yntalandyrý, utymdy jolyn taýyp, páter nemese otbasylyq jatahanadan baspana berý sııaqty naqty isterdi iskerlikpen júzege asyrýy kerek. «Erim» deıtin eli bolmasa, «Elim» deıtin er qaıdan shyqsyn?» degen emes pe. Ózderine degen qoldaýdy jete sezingen jastardyń boıynda otansúıgishtik qasıeti oıanyp, sanasynda jaýapkershilik sezimi kúsheıetini, soǵan sáıkes qamqorlyqqa qaıtarymy da qomaqty bolary sózsiz», - deıdi Erǵazy Manapuly.

Nurádil BEGІMBET