Elbasy usynǵan reformalardy júzege asyrý úlken jaýapkershilik júkteıdi - Á. Masalımova

ALMATY. QazAqparat - Elbasy usynǵan bes ınstıtýtsıonaldyq reformany júzege asyrý - árbir qazaqstandyq úshin úlken jaýapkershilik. Búgin Almatyda Memleket basshysy Nursultan Nazarbaevtyń «Ult jospary - qazaqstandyq armanǵa bastaıtyn jol» maqalasyn talqylaýǵa baılanysty ótken baspasóz máslıhaty barysynda fılosofııa ǵylymdarynyń doktory, professor, ál-Farabı atyndaǵy Qazaq ulttyq ýnıversıtetiniń fılosofııa jáne saıasattaný fakýltetiniń dekany Álııa Masalımova osylaı dedi.

Onyń aıtýynsha, bul reformalardyń tabysty bolýy bılik pen halyqtyń erik-jigerine tikeleı baılanysty.

«Ult jospary - «100 naqty qadam» - elimizdegi qoǵamdyq qatynastar júıesin túbegeıli ózgertedi. Bizdiń aldaǵy jyldardaǵy ortaq mindetimiz - osy bes ınstıtýtsıonaldyq reformany kezeń-kezeńmen júzege asyrý. Bul jerde olardy kimniń, qalaı júzege asyratyny óte mańyzdy. Memleketimizdiń saıası jaǵynan da, ekonomıkalyq jaǵynan da turaqtylyǵyn arttyrýǵa baǵyttalǵan bul keleli mindetterdi oryndaý qolymyzdan keledi. Al memleket pen qoǵam birtutastyǵyn jáne turaqtylyǵyn saqtasa jáne reformalar ǵylymı negizde júzege asyrylatyn bolsa, onda tıimdiligi arta túsedi», - dedi Á. Masalımova.

Sonymen qatar, ǵalym álemdegi eń damyǵan 30 eldiń qataryna ený strategııasyn tek bógde elderdiń tájirıbelerine súıinip qana júzege asyrý múmkin emestigin jetkizdi.

«Bul úshin otandyq ǵalymdar básekege qabiletti ǵylymı-zertteý jobalary arqyly jańa tásildemeler, jańa ádistemeler oılap tabýlary tıis.

Sondyqtan, biz birinshi kezekte qoǵamdaǵy ózekti máselelerdi anyqtaýǵa, bolashaq damýdyń modelin daıyndap, damý stsenarııin ázirleýge, monıtorıng, saraptama jáne baǵa berý júıesin qalyptastyrýǵa kúsh salýymyz qajet. Óıtkeni, damý barysynda kútpegen táýekelder, ózgerister oryn alýy múmkin. Biz buǵan daıyn bolýymyz kerek», - dedi Á. Masalımova.