Elbasy: Úshtildilik bizdiń balalarymyz úshin asa qajet
ASTANA. QazAqparat - Balalarymyzdyń úsh tildi bilýi - qajettilik. Búgin «Táýelsizdik. Kelisim. Bolashaǵy birtutas ult» kún tártibimen ótip jatqan Qazaqstan halqy Assambleıasynyń XXIV sessııasynda Elbasy Nursultan Nazarbaev osylaı dedi.
«Men balalardy kishkentaı kezinen úıretý qajet degenge tolyǵymen kelisemin. Úshtildilik - bizdiń balalarymyz úshin asa qajettilik. Olar memlekettik tildi bilýi tıis, al orys tili - qarym-qatynas tili, aǵylshyn tili bolsa, álemdik til, álemdik ǵylym, ınnovatsııa men ınternet tili», - dedi Memleket basshysy.
Elbasy óz sózinde mekteptiń bilim baǵdarlamasyna úshtildilikti engizý balalardy bolashaqqa daıyndaýdyń alǵashqy qadamy sanalatynyn basa aıtty.
«Álemde qandaı til basymdyqqa ıe bolatynyn kim biledi? Aıtpaqshy, ekinshi orynda adam sany boıynsha qytaı tili tur. Múmkin, bir ýaqyttarda ony da oqýǵa týra keler. Bilmeımin, múmkin 1,2 mlrd. adam qoldanatyn úndis tili alǵa shyǵar. Biraq, qazirgi ýaqytta alǵa qaraı ilgerileý úshin, bilimdi bolý úshin, jas adamnyń qalyptasýy ári ózin, otbasyn qamtamasyz etip, balalaryna tálim-tárbıe berý úshin aǵylshyn tili kerek», - dedi N.Nazarbaev.
