Elbasy Úndistan Premer-Mınıstrin elderiniń ShYU múshe bolýymen quttyqtady
Qazaqstan Prezıdenti eki el arasyndaǵy qarym-qatynastardyń dáıekti damyp kele jatqanyna toqtalyp, Úndistan Premer-Mınıstrin elderiniń Shanhaı yntymaqtastyq uıymynyń quramyna tolyq quqyly múshe bolýymen quttyqtady. Nursultan Nazarbaev Qazaqstannyń osy máselege baılanysty Úndistandy áýel bastan tolyq qoldaǵanyn aıtty.
«Byltyr ózińiz bizge qoldaý kórsetip, Astanada ótken halyqaralyq «EKSPO-2017» mamandandyrylǵan kórmesine kelgenińiz úshin Sizge rızashylyǵymdy bildiremin. Sol arqyly osy sharaǵa halyqaralyq deńgeıde nazar aýdarylýyna septigińizdi tıgizdińiz», - dedi Qazaqstan Prezıdenti.
Memleket basshysy qol jetkizilgen ýaǵdalastyqtardy júzege asyrýdyń nátıjesinde byltyrdyń ózinde Qazaqstan men Úndistan arasyndaǵy taýar aınalymy 53 paıyzǵa artyp, 1 mıllıard dollarǵa jetkenin atap ótti.
«Qazirgi ýaqytta elderimiz arasynda ǵarysh, farmatsevtıka salasyndaǵy, áskerı-tehnıkalyq sektordaǵy jáne basqa da salalardaǵy yntymaqtastyq belsendi damyp keledi. Bizge osy baǵyttaǵy jumystardy jalǵastyrý kerek», - dedi Qazaqstan Prezıdenti.
Úndistan Premer-Mınıstri Úndistan ókiliniń Birikken Ulttar Uıymy Halyqaralyq sotynyń quramyna saılanýyna qoldaý kórsetkeni úshin Nursultan Nazarbaevqa alǵys aıtyp, eki el arasyndaǵy kópjaqty yntymaqtastyq tabysty damyp, nyǵaıyp kele jatqanyna toqtaldy.
«Sizdi Qazaqstannyń elordasy - Astana qalasynyń 20 jyldyǵymen quttyqtaımyn jáne «Astana» halyqaralyq qarjy ortalyǵynyń ashylýyna baılanysty izgi nıetimdi bildiremin», - dedi Úndistan Premer-Mınıstri.
Kezdesý sońynda Narendra Modı Qazaqstannyń Úndistan úshin Ortalyq Azııadaǵy eń iri saýda seriktesteriniń biri sanalatynyna toqtalyp, Úndistan tarapynyń «Tsıfrlyq Qazaqstan» baǵdarlamasy aıasyndaǵy jobalardy júzege asyrýǵa múddelilik tanytyp otyrǵanyn jetkizdi. Sonymen qatar Úndistan Premer-Mınıstri Qazaqstan tarapynyń Halyqaralyq Kún Alıansyna qosylýyna ótinish bildirdi.
