Elbasy úndeýinde jastar máselesine basty kóńil bólingeni qýantady - professor Jambyl Aımenov
Tarıh ǵylymynyń doktory ári Qazaqstannyń eńbek sińirgen qaıratkeri Jambyl Talhauly Elbasy N.Nazarbaevtyń jyl saıynǵy Joldaýlarynda, kúndelikti jumysynda jastar máselesin umyt qaldyrmaıtynyn, memleket tarapynan olarǵa degen qamqorlyqty ulǵaıta túsip otyrǵanyn aıtady. Al, kúni keshe Elbasymyz Qazaqstan Respýblıkasynyń Parlamenti palatalarynyń birlesken otyrysynda jarııalanǵan úndeýde joǵary bilim alýdyń qoljetimdiligi men sapasyn arttyrý boıynsha bastamalar qamtylǵanyn erekshe yqylaspen qabyldaǵanyn jetkizdi.
«Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» atty úshinshi bastamany joǵary bilim sapasy men onyń qoljetimdiligine jasalǵan taǵy bir qadam dep esepteýge bolady. Bul qazaqstandyq jastardy qyzyqtyrady ári úmit syılaıdy. Bul bastama Tórtinshi ónerkásiptik revolıýtsııa jaǵdaıynda qajet bolatyn myńdaǵan jańa mamandardy ázirlep shyǵýǵa múmkindik beredi»,- deıdi Jambyl Aımenov.
Búginde prorektor qyzmet etetin Ońtústik Qazaqstan memlekettik ýnıversıtetinde 17 myńnan astam jastar bilim alýda. Stýdentterdiń úshten bir bóligi memlekettik grant esebinen oqyp jatyr. Basym bóligi tehnıkalyq mamandyqtardy meńgerýde.
«Elbasy óz Úndeýinde joǵary bilim alýdyń qoljetimdiligi men sapasyn arttyrý úshin qazir jyl saıyn bólinetin granttardyń sanyn kóbeıtýdi tapsyrdy. Onyń 11 myńy tehnıkalyq mamandyqtar boıynsha bakalavrlyq bilim berýge tıesili bolatyndyǵy ýnıversıtet ujymynyń zor qulshynysyn týdyryp otyrǵandyǵy jasyryn emes. Halqynyń negizgi úlesin jergilikti ult ókilderi quraıtyn Ońtústik Qazaqstan oblysy úshin de bul bastamanyń bereri mol dep esepteımiz. Bul tórtinshi ónerkásiptik revolıýtsııa jaǵdaıyndaǵy jańa ekonomıkada zor suranysqa ıe bolatyn san myń jańa mamandy daıarlaýǵa múmkindik beredi»,-deıdi professor.
Onyń pikirinshe, tehnıkalyq jáne aýyl sharýashylyǵy mamandyqtary boıynsha barlyq joǵary oqý oryndary granttarynyń qunyn ulttyq joǵary oqý oryndarynyń granttary deńgeıine deıin kóterý máselesi aımaqtyń joǵary oqýoryndarynyń mártebesin arttyrýǵa septigin tıgizedi. Bul bastamalardyń barlyǵy is júzinde jastardyń sapaly bilim alýyna, parasatty tulǵa bolyp qalyptasýyna, kásibı maman retinde ómirden óz ornyn tabýyna jasalyp jatqan qamqorlyq, olardyń bolashaǵyna degen senimdi baǵdar bolmaq.
