Elbasy úndeýi zor jaýapkershilik júkteıdi - rektor Baımyrzaev
Sebebi, Qazaqstan óz táýelsizdigine qol jetkizgen kezde eldegi barlyq jaǵdaıdy saraptaı kele Prezıdenttik bılik jolyn tańdady. Memleket basshysynyń úndeýine qatysty Іlııas Jansúgirov atyndaǵy Jetisý memlekettik ýnıversıtetiniń rektory, geografııa ǵylymdarynyń doktory, professor Qýat Baımyrzaev osyndaı pikir bildirdi.
Onyń aıtýynsha, Elbasy aldymen ekonomıka, sodan keıin saıasat degen prıntsıpti ustandy. Ýaqyt onyń durystyǵyn dáleldedi. Sodan bergi 25 jyl ishinde eldiń ekonomıkasy kóterilip, turaqtaldy. Qazaqstan álemdik qaýymdastyqta tanylyp, damyǵan 50 eldiń qataryna endi. Endigi kezekte saıası reformany aldyǵa ozdyrý qajettiligi týyndap otyr. Osyny der kezinde, sanaly túrde baıqaǵan Prezıdent Úndeý joldady. Órkenıetti eldi basqarýdyń tıimdi joly demokratııalyq basqarý degen ustanymmen zań shyǵarýshy organ - parlamentke, atqarýshy organ - úkimetke, qadaǵalaýshy organ - sotqa basqarý ókilettiligin bólip bermek. Aldaǵy ýaqytta Parlament atqarýshy bılikten eldegi áleýmettik-ekonomıkalyq ahýal haqynda jaýapkershilik suraýǵa, ár jylǵy respýblıkalyq bıýdjettiń, taǵy basqa da áleýmettik-ekonomıkalyq mańyzy bar baǵdarlamalardyń oryndalýy jaıynda Úkimetke jáne tıisti mınıstrlikterge parlamenttik talap qoıa alady. Tıisinshe úkimettiń de quzyrlyǵy artyp, halyqpen tyǵyz baılanys ornata alady. Jalpy, bılik tarmaqtaryna ókilettik berý úlken jaýapkershilik artý degen sóz. Úkimet pen atqarýshy organdar, Parlament jáne osyǵan qatysy bar saıası partııalar atalǵan ókilettikke ıe bolsa, aldymen halyqtyń, bolashaq urpaqtyń jáne memlekettiń aldynda ózderine zor jaýapkershilik júktelgenin sezinedi.
