Elbasy Úndeýi elimizdiń demokratııalyq damýǵa taǵy bir qadam basqanynyń aıqyn kórinisi - senator Jabal Erǵalıev
Bul týraly "QazAqparat" HAA tilshisine QR Parlamenti Senatynyń depýtaty Jabal Erǵalıev aıtty.
Senatordyń aıtýynsha, «Bılik tarmaqtary arasynda ókilettikterdi qaıta bólý máseleleri jónindegi» Úndeýde Úkimet pen Parlamenttiń memleketti basqarýdaǵy róli men jaýapkershiligin kúsheıtýge úlken mán berilip otyr.
"Konstıtýtsııalyq ózgeristerde Parlament Palatalarynyń Úkimet músheleriniń qyzmetin baqylaý ókilettigin kúsheıtý arqyly jáne de Úkimettiń Palatalar aldynda jaýapty bolady dep belgilenýi de elimizdiń áleýmettik-ekonomıkalyq, ózge de baǵdarlamalardyń oryndalý barysyn qadaǵalap, isti tııanaqtap otyrýǵa da negiz bolary sózsiz. Sondaı-aq, ózgeristerdiń bir parasy sot júıesi men prokýratýranyń konstıtýtsııalyq negizderin naqtylaýdy qamtıtyn bolady. Bul adam quqyn qorǵaýdaǵy jáne zańdylyqty qamtamasyz etýdegi jańa bir demokratııalyq qadam retinde qarastyrylyp otyr", deıdi senator óz sózinde.
Sonymen qatar, senator qazaqstandyq qoǵam bul jolǵy Úndeýdi de, onda aıtylǵan mindetterdi de zor qanaǵat sezimmen qabyldaǵanyn aıtýda.
"Táýelsizdigimizdiń shırek ǵasyrlyq kezeńinde halqymyz saıasatta sabyrly bolýdy úırendi. Elbasynyń ustanymy negizinde eldiń birligi men yntymaǵyn bárinen de joǵary qoıýdyń qanshalyqty baǵaly da qundy ekendigine kózimiz aıqyn jetip otyr. Endigi arada qoǵamda júrgiziletin kez kelgen reforma, kez kelgen ózgerister bolsyn, solardyń bári de eldiń birligi men yntymaǵyn uıystyrýdy odan ári tereńdetýdi kózdegende ǵana tabysty bolaryna eshbir kúmán-kúdik bolmaýy kerek. Buǵan Elbasynyń ómirlik ustanymy, júrgizip kele jatqan saıasaty men reformalary aıqyn dálel bola alady", dep sózin odan əri jalǵastyrdy senator.
"Bul sózimizdiń bir jelisin buryndary aıtylǵan myna bir pikirimizdegi: «Eldiń tynyshtyǵy táýelsizdigimizdiń turaqtylyǵynyń kepili. El tynyshtyǵy eń áýeli bizdiń ózimizdiń alańdamaı ómir súrip, alda turǵan mindetterdi júzege asyrý arqyly myna dúbirli dúnıe dúrmeginiń shańyn qaýyp qalmas úshin kerek. El bolyp qalý úshin, egemendikti ustap turý úshin kerek! Bizge keregi de sol - el men egemendik! Qalǵanynyń bári de ótkinshi! Nazarbaev neni de bolsa elimen birge kórdi, elimen birge tózdi, elimen birge jeńdi! Biz táýelsiz el bolǵanymyzdy aıdaı álemge batyl jarııalaǵannan keıin, sol endi aıdaı álemge batyl ún qatyp, batyl qadam da jasaýymyz kerek edi. Sony jasaı bildik! Sony jasata bildi Elbasymyz!» degen oıymyzdy qaıta bir jańǵyrta otyryp, konstıtýtsııalyq reformalardyń jobasyn jalpyhalyqtyq talqylaýǵa usyný jónindegi sheshim elimizdiń demokratııalyq damý jolyna taǵy bir qadam basqanynyń aıqyn kórinisi dep nyq aıta alamyz»,-dep túıindedi senator.
