Elbasy: Uly derjavalar adamzat taǵdyry úshin árdaıym jaýapty

ASTANA. QazAqparat - Aqordada BAQ ókilderimen kezdesken Prezıdent Nursultan Nazarbaev búgingi halyqaralyq jaǵdaıdy 1962 jylǵy Karıb daǵdarysyna nelikten uqsatatynyn túsindirdi, dep habarlaıdy QazAqparat tilshisi.

«Brıýsselde ótken «Azııa-Eýropa» forýmynyń Sammıtine 55 memlekettiń ókili qatysty. Barlyǵy da ekonomıkalyq ıntegratsııa, jaqyndasý týraly sóz aıtysty. Biraq, bári de búgingi tańda úlken kedergilerdiń bary týraly aýyz ashqan joq. Bul Amerıka men Reseı arasyndaǵy, Eýropa men Reseı, tipti Eýropanyń óziniń Amerıkamen arasyndaǵy qarym-qatynastar edi. Shyǵysta Qytaı men AQSh-tyń arasyndaǵy saýda qatynastary da máz emes. Bir qyzyǵy, eshkim bul týraly eshteńe dep aıtpady. Barlyǵy aqyry aýyz ashpaǵannan keıin túzetý jasaýǵa týra keldi. «Typ-tynysh qana bárin jyly jaýyp qoıyp, sóılep otyrmyz. Al osyndaǵy aıtylǵandardyń bári de teketires jalǵasa beretin bolsa, iske aspaıdy» dedim. Nelikten men Karıb daǵdarysymen salystyrdym? Reseıdiń shekaralaryna, Baltyq elderine, Eýropanyń soltústigi men ońtústigine, Polshaǵa áskerı tehnıkany jaqyndatý neniń belgisi? Bul ne taǵy? Bul soǵysqa daıyndyq pa? Árıne, Reseı jaýap retinde sharalar qabyldaıdy, qorǵanysqa den qoıady», - dedi Nursultan Nazarbaev.

Memleket basshysy álemdi ıadrolyq soǵysqa apara jazdaǵan Karıb daǵdarysy kezinde Keńes Odaǵy Kýbaǵa zymyrandardy ornalastyrǵandyǵyn, bul jaǵdaı 1962 jyly týyndaǵanyn eske saldy. Amerıka Qurama Shtattary ol zymyrandardy joıýdy talap etkende KSRO AQSh-tan Túrkııadan óz zymyrandaryn áketýdi talap etken edi.

QR Prezıdenti uly derjavalar adamzat taǵdyry úshin árdaıym jaýapty ekenin atap ótti.

«Sondyqtan, búgingi kúni AQSh, Reseı, Qytaı jáne Eýropalyq odaq, bálkim, Astana alańynda barlyq suraqtardy talqylaý úshin birge jınalýy kerek. Reseı men Qytaı óz kelisimin bildirgen, endigi kezekte Batys elderimen jumys jalǵasýda», - dedi ol.

Elbasy sondaı-aq Ýkraına men Reseıdiń arasyndaǵy kelissózdi úshinshi tarapty aralastyrmaı júrgizýge shaqyrdy.