Elbasy: Uly Dalamyzdyń shebi bútin, shekarasy berik bolyp, tynyshtyqqa bólene bersin! (FOTO)
«Osydan 24 jyl buryn, 1992 jyly 7 mamyrda biz Qazaqstan Respýblıkasynyń Qarýly Kúshterin qurý týraly sheshim qabyldap, Men Jarlyqqa qol qoıdym. Táýelsizdik jarııaladyq, ol kezde bizdiń áskerimiz de, polıtsııamyz da bolmady. Mine osy 7 mamyrdy elimizdiń merekesi retinde atap kelemiz. Otan qorǵaýshy kúni men aldaǵy Uly Jeńis kúni barshamyzǵa qutty bolsyn!» - dedi óz quttyqtaýynda Elbasy.
Osy rette Memleket basshysy Qazaqstan áskeri búginde aıbyndy armııaǵa aınalǵanyn, zamanaýı tehnıkamen jaraqtalǵanyn, oqý-jattyǵýlar jasaýǵa barlyq jaǵdaılar bar ekendigin atap ótti.
«Barshańyzdy beıbitshilikti baǵalaýǵa, tatýlyq pen turaqtylyqty saqtap, nyǵaıtýǵa úndeımin. Uly Dalamyzdyń shebi bútin, shekarasy berik bolyp, tynyshtyqqa bólene bersin! Baıraǵymyz bıikte jelbirep, dańqymyz arta bersin!» - dedi N. Nazarbaev.
Bıylǵy merekelik sharalar Qazaqstan Táýelsizdiginiń 25 jyldyǵy men «Máńgilik el» tuǵyry - Qýatty ásker» taqyrybynda ótýde. Búgingi kontserttiń negizgi ıdeıa jelisi Otan úshin qurban bolǵandardy eske alýǵa, ardagerlerge qurmet kórsetýge, Otandy qorǵaý paryzynyń kıeliligi, beıbitshilik pen kelisimdi saqtaý mańyzdylyǵyna, elimizdiń Táýelsizdigin qorǵaýǵa negizdelgen.
Atap aıtqanda kontserttik baǵdarlamada QR Qorǵanys mınıstrliginiń áskerı ansambli men estradalyq-sımfonııalyq orkestri solısteriniń, sondaı-aq elimizdiń tanymal ártisteriniń oryndaýynda patrıottyq ánder men jýyngerler týraly mýzykalyq shyǵarmalar oryndaldy.
Baǵdarlamaǵa S. Nurmaǵambetov atyndaǵy «Jas ulan» respýblıkalyq áskerı mektebi tárbıelenýshileriniń oryndaýyndaǵy «Alǵa nurly tańǵa» áni, Roza Rymbaeva, Jámıla Serkebaeva, Edil Qusaıynov, Vıktor Homenkonyń oryndaýyndaǵy «Taǵzym» áni jáne taǵy basqa da nómirler kirdi.
