Elbasy Ult kóshbasshysy týraly zańǵa qol qoısyn, qoımasyn biz úshin kóshbasshy bolyp qala beredi - M.Aısına
ASTANA. Maýsymnyń 4-i. QazAqparat /Aıdar Ospanalıev/ - «Memleket basshysy Ult kóshbasshysy týraly zańǵa qol qoısyn, qoımasyn biz úshin ol beıresmı túrde kóshbasshy bolyp qala beredi».
Parlament Májilisinde ótken jalpy otyrystan soń Elbasy Nursultan Nazarbaevtyń Úndeýine baılanysty jýrnalıstermen suhbattasqan Májilis depýtaty Maıra Aısına osyndaı pikir bildirdi, dep habarlaıdy QazAqparat.
«Meniń bul pikirimdi ózgeler de qoldaıdy degen oıdamyn. Nursultan Nazarbaev qashanda bizdiń kóshbasshymyz bolǵan jáne bolyp ta qala bermek. Bul shyn kóńilmen aıtylǵan sóz. Prezıdent óziniń lıderlik qasıetterin ispen dáleldegen azamat. Buny halyqaralyq sarapshylardyń ózderi qoldap otyr», dep atap kórsetti depýtat óz sózinde.
Sondaı-aq onyń paıymdaýynsha, qalyń kópshilik Prezıdenttiń kóshbasshylyǵyn moıyndap otyr. «Al ony zań túrinde engizý máselesine keletin bolsaq, bul bálkim sonshalyqty mańyzdy emeste bolar. Memleket basshysynyń bul zańǵa qol qoımaýy onyń mártebesin bıiktetpese kemite qoıǵan joq», dedi halyq qalaýlysy.
