Elbasy UQShU memleketteri birlese kúresetin qaterlerge toqtaldy
Suhbat barysynda Elbasy Ujymdyq qaýipsizdik týraly shart uıymynyń búgingi qaterlerimen kúres máselesine nazar aýdarǵan bolatyn.
«Búgingi tańda eń úlken qater - terrorızm, bul anyq. Al terrorızmmen kez-kelgen memleket jalǵyz kúrese almaıdy. Sondyqtan da bizdiń elderimiz ben arnaıy qyzmetterimiz UQShU aıasynda ózara yntymaqtasady. Osy arqyly qandaı da bolmasyn jaǵymsyz áreketterdiń aldyn alý baǵytynda ózara aqparat almasyp, áshkereleý múmkindigine ıe bolyp otyrmyz», - dedi N. Nazarbaev.
Sonymen birge Prezıdent ekinshi basty qater retinde mıgratsııany atady. Elbasynyń sózine qaraǵanda, Qazaqstan arqyly 4 mıllıonǵa tarta mıgrant-azamattar basqa elderge ótedi, al elimizdiń óz ishinde 600 myńǵa tarta mıgrant eńbek etedi. Sondyqtan da, kóship-qonýshylarmen jumys ta birlese atqarylady.
«Úshinshi, Aýǵanstan, Qazaqstan arqyly esirtki trafıgi Reseıge, tipti Eýropaǵa ketip jatyr. Mine, osyndaı trafıkterdi anyqtaý, esirtki tasymaldanatyn arnalardyń izine túsý úshin UQShU arnaıy oqý-jattyǵýlar ótkizedi. Óıtkeni, bizdiń bilýimizshe, búgingi álemde shamamen 250 mıllıon adam esirtki paıdalanady, álemdik sarapshylar málimeti boıynsha shamamen 10 mıllıon adam esirtki saldarynan ajal qushyp jatyr. Osyndaı náýbetti ásirese jastardyń arasyna taratpaý úshin bizge ujym bolyp jumylý qajet», - dedi Elbasy.
Prezıdent osy qaterler aıasynda memleketti ishten iritip, syrttan áser etetin destrýktıvti kúshterdiń pıǵylyn da atady. «Bul da qater ári ol da ujymdyq qaýipsizdiktiń qaperinde bolady. Biz osy baǵytta ǵana emes, basqa da sharalar aıasynda yntymaqtasamyz. Birinshiden, áskerılerdi oqytý júrgizilip jatyr. Ujymdyq shart qaýipsizdigi aıasynda biz jeńildikter arqyly bir-birimizdi qarý-jaraqpen qamtamasyz etetin bolamyz. Árıne, bul baǵytta qarýlandyrý óndirisiniń reseılik júıesi basymdyqqa ıe», - dedi Memleket basshysy.