Elbasy Úkimetke kelesi jyly «Jumyspen qamtýdyń» jańa jol kartasyn ázirleýdi tapsyrdy
ASTANA. QazAqparat - Búgin Astanadaǵy Táýelsizdik saraıynda Elbasy Nursultan Nazarbaev Qazaqstan halqyna Joldaýyn jarııalaý barysynda Úkimetke 2016 jyldyń 1-shi toqsanynyń sońyna deıin «Jumyspen qamtýdyń» jańa jol kartasyn ázirleýdi tapsyrdy.
Elbasynyń aıtýynsha, bul jańa baǵdarlama 2007-2009 jyldardaǵy tájirıbe qamtylýy shart.
«Bul baǵdarlama osynaý qıyn kezeńde jurtshylyqqa áleýmettik qoldaýdy keńeıtý maqsatynda ázirlenedi. Osy rette baǵdarlamany qarjylandyrý mólsheri osyǵan uqsas 2007-2009 jyldary júzege asyrylǵan baǵdarlamaǵa qaraǵanda aıtarlyqtaı artady. Baǵdarlama jergilikti ınfraqurylymdy damytý, aýyldyq aýmaqtardy damytý nátıjesinde eńbek naryǵynyń ornyqtylyǵyn saqtap qalady. Sonymen qatar, biliktilikti arttyrý arqyly qysqa merzimdik kadrlardy qaıta daıarlaý jumysynyń aýqymy keńeıe túsedi», - dedi N. Nazarbaev.
Budan bólek, Elbasy shaǵyn nesıe máselesi de ońtaıly sheshimin tabýy tıistigin atap ótti. «Osynyń bárine Úkimet, jergilikti ákimder basa nazar aýdaratyn bolady. Barlyq óńirlerde qyzý jumys kútip tur», - dedi N. Nazarbaev.
