Elbasy: Úkimetke birinshi jartyjyldyqta ınvestıtsııa tartý jónindegi ulttyq is-áreket josparyn ázirleýdi tapsyramyn
ASTANA. 27 qańtar. QazAqparat /Marlan Jıembaı/ - Elbasy Úkimetke aǵymdaǵy jyldyń birinshi jartyjyldyǵynda ınvestıtsııa tartý jónindegi ulttyq is-áreket josparyn ázirleýdi tapsyrdy.
Mundaı tapsyrmany Memleket basshysy búgin, Úkimettiń keńeıtilgen otyrysynda berdi.
Ekonomıka ósiminiń jańa qorlaryn izdestirip, ony paıdalaný qajettigin basa aıtqan Prezıdent: «Birinshiden, ınvestıtsııa úshin kúresýimiz qajet. Men bul týrasynda búgingi Joldaýymda aıttym»,-dedi.
Elbasynyń paıymynsha, bul jahandyq qarjy daǵdarysy qarsańynda mańyzdy. Óıtkeni, ınvestorlar óz kapıtalyn ósirýdiń senimdi kózderin izdestiretin bolady.
«Úkimetke birinshi jartyjyldyqta ınvestıtsııa tartý jónindegi ulttyq is-áreket josparyn ázirleýdi, Ekonomıkalyq yntymaqtastyq jáne damý uıymy standarttaryna sáıkes Qazaqstannyń ınvestıtsııalyq saıasatyn úılestirýdi tapsyramyn»,-dedi Prezıdent.
