Elbasy Úkimetke Atyraý qalasynda kásibı-tehnıkalyq bilim berýdiń óńiraralyq ortalyǵyn ashýdy tapsyrdy
ASTANA. 5 qyrkúıek. QazAqparat - Búgin Astanadaǵy Nazarbaev Ýnıversıtetinde «Qazaqstan bilim qoǵamy jolynda» atty taqyrypta dáris oqyǵan Memleket basshysy Nursultan Nazarbaev Úkimetke jyl sońyna deıin Atyraý qalasynda kásibı-tehnıkalyq bilim berýdiń óńiraralyq ortalyǵyn ashýdy tapsyrdy.
«Biz derbes (avtonomdy mektepter) mektepterdi damytyp, olarda baqylaý keńesterin qurýǵa tıispiz. Negizi osy mektepter deńgeıinde bastapqy jergilikti ózin-ózi basqarýdyń jańa tetikterin qarastyra bastaımyz», - dedi N. Nazarbaev.
Sonymen qatar, Prezıdent Qazaqstanda álemdik deńgeıdegi kolledjder jelisi qurylatynyn atap ótti. Bular tehnıkalyq bilim berýdi damytýdyń flagmanyna aınalmaq. Olardyń bazasynda bıznestiń qatysýyndaǵy bilim mekemeleriniń korporatıvtik basqarý formasy, jańa bilim berý standarttary synaqtan ótedi. «Osyǵan oraı, Úkimetke jyl aıaǵyna deıin Atyraý qalasynda kásibı-tehnıkalyq bilim berýdiń óńiraralyq ortalyǵyn ashýdy tapsyramyn. Bul keıinnen Astana men Almaty qalalarynda da ashylýy tıis», - dedi Elbasy.
