Elbasy Úkimetke áleýmettik saladaǵy ulttyq zańdarǵa túgendeý júrgizip, ony reformalaýdyń Tujyrymdama jobasyn jasaýdy júktedi
ASTANA. 10 shilde. QazAqparat - Úkimet Parlamentpen jáne «Nur Otan» HDP-men birlese otyryp 2012 jyldyń sońyna deıin áleýmettik saladaǵy ulttyq zańdarǵa túgendeý júrgizsin jáne áleýmettik jańǵyrtýdyń maqsattary men mindetterine sáıkes ony reformalaýdyń Tujyrymdama jobasyn engizsin.
Bul týraly Elbasy Nursultan Nazarbaevtyń Qazaqstannyń áleýmettik jańǵyrtylýy jónindegi 2-shi tapsyrmasynda aıtylǵan.
Memleket basshysynyń paıymynsha, bul jumysqa barlyq memlekettik organdardy jáne óńirler ákimderin qosý mańyzdy. Olar qoldanystaǵy zańdardyń tıimdiligin kúsheıtý jáne jańa zańdardy josparly ázirleý jóninde naqty usynystaryn engizýi tıis. «Máselen, jastar saıasaty týraly jańa zań aıasynda áleýmettik eńbek oryndarynda jas qazaqstandyqtar úshin «áleýmettik lıftilerdiń» tetikterin qurý mańyzdy. Biz jastarǵa qatysty jáıtterdi betimen jibere almaımyz», - dedi QR Prezıdenti.
Elbasy óz tapsyrmasynda atap ótkendeı, kásiptik biliktiliktiń ulttyq júıesi týraly zańdardyń bolýy talap etiledi. Qazaqstan qoǵamyn tómengi basty ındıkatorlary kórsetilgen áleýmettik standarttar men áleýmettik quqyqqa kepildikter týraly zań qajet.
«Parlamentke taıaýdaǵy sessııalar kezinde neǵurlym qajet etiletin zańdyq aktilerdi qaraǵan jón bolady. Munda jańa zańdardyń tıisti máselelerdi keshendi sheshýin, olardyń tikeleı áreket etýin, qazaqstandyqtardyń kútken úmitterine sáıkes kelýin, halyqtyń ómirin qolaıly da yńǵaıly etýin, bárine túsinikti de qoljetimdi bolýyn ereje esebinde basshylyqqa alý kerek. Depýtattar óz jumystaryn belsendi ete túsýge mindetti. Jáne osylardyń bárimen zańdardy jańalaý aıaqtalmaıdy. Tómende áleýmettik jańǵyrtý basymdyqtary aıasynda naqty zań aktisi jónindegi basqa da tapsyrmalar túıindelgen», - dedi N.Nazarbaev.
