Elbasy Úkimetke 3 aı merzim ishinde memlekettik qyzmetti kásibılendirý týraly naqty usynystar ázirleýdi tapsyrdy
ASTANA. 17 sáýir. QazAqparat /Qanat Mámetqazyuly/ - Úkimet Memlekettik qyzmet isteri agenttigimen birlese otyryp, úsh aı merzim ishinde memlekettik qyzmetti kásibılendirý týraly naqty usynystar ázirlesin. Búgin Úkimette ótken keńeste Memleket basshysy Nursultan Nazarbaev osylaı málimdedi.
«Ákim bir oblysqa kelgende ne isteıdi? Ol jergilikti kadrlarmen aınalyspaıdy, ózimen birge «komandasyn» ertip keledi. Bunda rezervpen eshqandaı da jumys istelip jatqan joq. Árıne, rezerv bar, biraq odan eshkim qyzmetke alynbaıdy. Sondyqtan da qyzmet aýystyrǵanda janyndaǵylarmen qotaryla kóshpeı, jergilikti kadrlarmen jumys isteý kerek. Biz asa talantty, perspektıvaly, memleketshildik ıdeıaǵa berik, joǵary bilikti kadrlyq rezervti jasaqtaýymyz kerek. ıAǵnı, bizge memleketshilder kerek. Bul sharýa eń birinshi kezektegi jáne uzaqmerzimdi sıpat alýy shart», - dedi Elbasy.
Sonymen qatar, Prezıdent saıası, ákimshilik jáne memlekettik qyzmetter arasyndaǵy shekteý jumystaryn jalǵastyrý kerektigin aıtyp, joǵary ákimshilik qyzmetkerler korpýsyn qurý qajettigin, ortalyq jáne jergilikti deńgeıde kásibı, joǵary bilikti mamandar tartý kerektigin aıtty. «Bundaı basqarý korpýsyn qalyptastyrý úshin QR Prezıdenti janynan arnaıy komıssııa qurǵan oryndy. Memlekettik qyzmette rotatsııalyq qaǵıdatty da engizgen lázim», - dedi N. Nazarbaev.
