Elbasy Úkimet pen memlekettik organdardyń basshylaryna tikeleı jelide qamtylmaǵan halyq saýaldaryna jaýap berýdi tapsyrdy
A. Qarashanyń 13-i. QazAqparat /Ernur Aqanbaı/ - Elbasy Nursultan Nazarbaev Úkimetke jáne barlyq memlekettik organdardyń basshylaryna tikeleı jeli boıynsha kelip túsken halyqtyń saýaldaryna tolyq jaýap berip, olardy elimizdegi jetekshi buqaralyq aqparat quraldarynda kórsetip, jarııalaýdy tapsyrdy.
Prezıdent bul tapsyrmany búgin tikeleı jelide qazaqstandyqtardyń saýalyna jaýap berip bolǵannan keıin berdi, dep habarlaıdy QazAqparat
«Men Úkimetke, barlyq mınıstrlikter men vedomstvolarǵa, barlyq oblystardyń, aýdandar men qalalardyń ákimdikterine kelip túsken saýaldardy túgeldeı qamtyp, olarǵa jaýap berýdi tapsyramyn», dedi N. Nazarbaev.
Osy oraıda Memleket basshysy elimizdegi basty ulttyq telearnalarǵa jáne basqa da telearnalarǵa jyldyń sońyna deıin ekrandarynda mınıstrlermen, olardyń orynbasarlarymen, ákimdermen qoıylǵan saýaldarǵa qatysty efırler uıymdastyrýdy usyndy. «Olar da men sııaqty qalǵan suraqtarǵa jaýap bersin», dedi Prezıdent. N. Nazarbaev sondaı-aq elimizdiń negizgi basylymdary «Egemen Qazaqstan» men «Kazahstanskaıa pravda» gazetterine jáne basqa da gazetterge bul máseleni muqııat qadaǵalap, suraqtardyń jaýabyn jarııalaýdy usyndy. «Osylaısha biz barlyq máselelerdi qamtyp, olarǵa jaýap berýge tyrysamyz», dedi Elbasy.
