Elbasy Úkimet basshysyna aýdandyq joldarǵa kóńil bólýdi tapsyrdy
«Biz respýblıkalyq mańyzy bar joldardy salyp jatyrmyz, al eger aýdandardyń arasynda jol bolmasa, adamdar ony sezinbeıdi», - dedi Nursultan Nazarbaev Úkimet basshysyn qabyldaý kezinde.
Elbasy asyǵýdy talap etpeıtin keıbir jobalardy keıinge qaldyryp, birinshi kezekte aýdandar men kentterdiń ishindegi joldarǵa kúsh salý qajettigin basa aıtty.
Sondaı-aq Memleket basshysy basqa máselelerge de nazar aýdardy. Prezıdenttiń aıtýynsha, shaǵyn jáne orta bızneske aıtarlyqtaı kómek berilip jatyr. «Sońǵy kezderi biz shaǵyn jáne orta bıznes úshin qajettiniń bárin jasap berdik, sonda da onyń kólemi artpaı otyr. Enjar jumys istep jatyrmyz. Barlyq jerde», - dedi ol.
«Zańdardyń ústemdigi týraly aıttyq, zańdardy ózgerttik, bárin jasadyq. Memlekettik qyzmetke tańdaý tártibin ózgerttik, al memlekettik qyzmetshilerdiń adamdarǵa, qarapaıym halyqqa degen kózqarasy ózgermeı otyr. Sondyqtan nelikten jumys júrmeı jatqanyn bárimiz birge oılanýymyz qajet. Barlyǵy bar, qarjy belgilengen. Eger qazir turǵyn úı qurylysy, Bes áleýmettik bastama boıynsha da osylaı bolsa, bul tym jaman bolady», - dep qadap aıtty Nursultan Nazarbaev.
«Qabyldanǵan sheshimderdiń naqty oryndalýy jáne Úkimet tarapynan máselelerdiń sheshimin baqylaý turǵysynan birshama suraqtar bar», - dedi Prezıdent.
Eske sala keteıik, Qazaqstan Prezıdenti Premer-Mınıstr Baqytjan Saǵyntaevty qabyldady. Kezdesýde Úkimettiń 2018 jylǵy birinshi jartyjyldyqta atqarǵan jumystarynyń qorytyndylary, memlekettik jáne salalyq baǵdarlamalardyń iske asyrylý barysy talqylandy.
