Elbasy tyǵyryqtan shyǵar adastyrmas aq jol taýyp, kemel oıly kemeńgerlik tanytty - jazýshy Sábıt Dosanov
Bul pikirin jazýshy, Memlekettik syılyqtyń laýreaty, Túrki álemine sińirgen eńbegi úshin Halyqaralyq syılyǵynyń laýreaty Sábıt Dosanov búgin «Egemen Qazaqstan» gazetinde jarııalanǵan Parlament depýtattarynyń kezekten tys saılaýy jaıly tolǵanysynda bildirdi.
Jalǵyz Qazaqstan emes, búkil álem buryn-sońdy bolmaǵan asa qıyn, óte kúrdeli kezeńmen betpe-bet kelip otyr. Daǵdarysqa shydamaı eseńgiregen kári qurlyq, soǵys órti sharpyǵan shalajansar elder, eki qolǵa bir kúrek taba almaǵan sharasyzdar, bir úzim nanǵa zar bolǵan mıllıondaǵan bosqyn... Baqytsyzdyq baspaldaqtary kún saıyn kóbeımese, azaıar emes. Sát saıyn qyryq qubylyp turǵan alaquıyn ýaqyt, almaǵaıyp zamanda tyǵyryqtan shyǵar adastyrmas aq jol taýyp, kemel oıly kemeńgerlik tanytý - aýadaı qajet. Ult baǵyna týǵan tulǵa, álemdik deńgeıdegi dana saıasatker Nursultan Ábishuly Nazarbaevta Jaratqan Iem jomarttyqpen syılaǵan sondaı aýadaı qajet qasıet bar. Sonyń kórkem bir kórinisi - Memleket basshysynyń 5-shi shaqyrylymdaǵy Parlament Májilisin taratý týraly Jarlyqqa qol qoıýy, sondaı-aq Parlament Májilisi depýtattarynyń kezekten tys saılaýyn taǵaıyndaýǵa baılanysty halyqqa úndeýi.
Osy bir qıyn kezeńde, el aldynda syn-qaterler men asa kúrdeli mindetter turǵan shaqta Prezıdent aıtqandaı: «Bizde taǵdyrǵa moıynsunyp, áıteýir bir ýaqyttary bári ornyna keletinine, munaı baǵasy kóterilip, jaǵdaıdyń jaqsaratynyna úmittenip otyrýǵa ýaqyt joq». Osy sózimen, soǵan saı jedel sheshimimen N.Nazarbaev Dante Alıgerı aıtqan: «Ýaqytty zaıa jibergenge ókinetin danyshpan adam» ekenin taǵy bir dáleldedi.
Ult Josparyn jyldam jáne biliktilikpen júzege asyrý Parlamenttiń tıimdi jumysyna táýeldi. Olaı bolsa, Parlamentke jańashyl, jańa kúshterdiń kelýi asa mańyzdy. Sol sebepti de Elbasy aıtqandaı: «Saıası partııalar kún tártibindegi mindetterdi túsine biletin saýatty, isker jáne el múddesine adal kandıdattardy usynýǵa tıis».
Syn kezeńde jasalǵan syndarly sheshimniń taǵy bir tıimdiligi - ýaqyttan utýmen birge, barlyq deńgeıdegi máslıhattar saılaýyn Parlament saılaýymen qatar ótkizý - qyrýar qarjy únemdeletindiginde. Qoǵamnyń barlyq áleýmettik toptary ýaqyttan oza jasalǵan Besinshi shaqyrylǵan Qazaqstan Respýblıkasy Parlamenti Májilisi depýtattarynyń kezekten tys saılaýyn taǵaıyndaý týraly Prezıdent Jarlyǵyn qyzý qoldap otyr. Al bizdiń, zııaly qaýymnyń qasterli de qasıetti boryshy - Elbasynyń halyqqa úndeýinde aıtylǵan mindetterdi sózimizben de, isimizben de qoldaý. Ulylardyń biri aıtqandaı: «Qıynshylyq shegine jetken asa kúrdeli kezeńde mádenıet qaıratkerleriniń róli kúrt artady». Sol
jaýapkshilikti sezine bilsek, Otan aldyndaǵy qaryzymyz ben paryzymyzdyń ótelgeni.
