Elbasy Túrkistandaǵy qoǵamdyq qabyldaý bólmesiniń jumysymen tanysty

TÚRKІSTAN. QazAqparat – Elbasy Nursultan Nazarbaev Túrkistan oblystyq ákimdiginiń jańa ǵımaratyndaǵy «Nur Otan» partııasynyń qoǵamdyq qabyldaý bólmesimen tanysty. Munda partııanyń oblystyq fılıalynyń jetekshiligimen quqyq qorǵaý organdary men áleýmettik salaǵa jaýapty mekemelerdiń basshylary qoǵamdyq qabyldaý ótkizedi, dep habarlaıdy QazAqparat tilshisi.

Atalǵan joba halyq pen bılik arasyn jaqyndatý baǵytynda qolǵa alynyp otyr. Óńir basshysy, «Nur Otan» partııasynyń Túrkistan oblystyq fılıalynyń tóraǵasy Ómirzaq Shókeev Elbasyǵa turǵyndardyń ótinishi men quqyqtary árdaıym basty nazarda bolatynyn jetkizdi. Ult kóshbasshysyn bul jobanyń jumysymen «Nur Otan» partııasynyń Túrkistan oblystyq fılıaly tóraǵasynyń birinshi orynbasary Beısenbaı Tájibaev tanystyrdy. Munda partııa halyqty ashyq formatta qabyldaıdy. Arnaıy qoǵamdyq qabyldaý bólmelerinde turǵyndardyń talap-tilegi tyńdalyp, aryz-shaǵym, ótinishter boıynsha tıisti jumystar júrgiziledi. Sonymen birge quqyq qorǵaý organdary men turǵyndar jıi suraq qoıatyn áleýmettik salanyń ókilderi de turǵyndarǵa kómektesedi. Árbir azamattyń shaǵymy post-termınal arqyly qabyldanady. Barlyq ótinishter partııa tarapynan turaqty qadaǵalanýǵa alynady. Bul jańa bastama ashyq ákimdik jobasyn jandandyrý maqsatynda qolǵa alynyp otyr.

Aıta keteıik, búginde Elbasy, «Nur Otan» partııasynyń tóraǵasy Nursultan Nazarbaevtyń «Senim. Dıalog. Bolashaqqa nyq qadam» – «Nur Otan» partııasynyń 7 serpini» baǵdarlamasy aıasyndaǵy tapsyrmasyna sáıkes, Túrkistan oblysynda júıeli jumys atqarylyp jatyr. Qoǵamdyq qabyldaý keńsesi «Open space» formatynda ashylyp, jańa ǵımaratqa kóshirildi. Laýazymdy tulǵalar turǵyndardy turaqty túrde qabyldap, máseleler sheshimin tabýda. Bıyl qańtar-qazan aılary aralyǵynda partııa fılıalynyń barlyq Qoǵamdyq qabyldaý bólmelerine 6047 aryz-shaǵym túsken: onyń 2358 (ıaǵnı 39%) ońtaıly sheshilse, 3611 ótinishke zań aıasynda keńes berilgen. 9 aıda 2006 qabyldaý júrgizilip, 9937 turǵynnyń ótinishi betpe-bet tyńdaldy. Ótinish-tilekterdiń basym bóligi oń sheshimin taýyp, qanaǵattandyryldy. Sondaı-aq kásipkerlerge zań júzinde keńes berip, aryz-shaǵymyn tyńdaıtyn Qoǵamdyq bıznes-qabyldaýy da iske qosylǵan.

Óńirde «Nur Otan» partııasynyń 90 myńǵa jýyq múshesi bar. 255 bastaýysh partııa uıymyna taldaý júrgizilip, 2,5 myńnan asa adam partııa qatarynan shyǵarylǵan. Jańadan bes bastaýysh partııa uıymy ashylyp, kásiporyn men sharýashylyq uıymdarynyń ókilderi partııa qataryna tartyldy. Osy jyldyń sońyna deıin uıymdardyń sanyn onǵa jetkizý josparlanyp otyr.