Elbasy Túrkistan jaıly: Jańa oblysta jańa tártip bolsyn

ASTANA. QazAqparat - Búgin Aqordada Qazaqstan halqyna kezekti Joldaýyn jarııalaǵan Elbasy Nursultan Nazarbaev Túrkistan oblysyndaǵy jemqorlyqty synady, dep habarlady QazAqparat tilshisi.

Memleket basshysy Túrkistan oblysynda tipti eden tazalaýshy da jumysqa ornalasý úshin para beretindigin synǵa alyp, osy rette óńir basshysy Janseıit Túımebaevtan bul problemany qalaı sheshpek oıy bar ekendigin surady.

«Nursultan Ábishuly, ótkende «Nur Otannyń» jıynynda da bul máseleni aıtqan edińiz. Biz odan keıin arnaıy sharalar qabyladyq. Qazir tehnıkalyq qyzmetkerlerdi, muǵalimderdi, dırektorlardy ınternet arqyly qabyldaımyz. Jeke adammen  jolyǵý joq. Sonymen qatar balabaqshalarǵa, 1 synypqa qabyldaýdy jónge keltirdik»,- dep jaýap berdi oblys basshysy.

«Jańa oblysta jańa tártip bolsyn», - dedi  Elbasy.