Elbasy túrikterdiń Reseı ushaǵyn atyp túsirýin túbegeıli qoldaǵan joq - Onjanov
ASTANA. QazAqparat - Nursultan Nazarbaev túrik qarýly kúshteriniń Reseı ushaǵyn atyp túsirýin túbegeıli qoldaǵan joq. Bul jaıynda «Habar» telearnasynan kórsetilgen «Bitimger mıssııasy» derekti fılminde QR Prezıdentiniń kómekshisi Nurlan Onjanov aıtty, dep habarlaıdy QazAqparat.
«Ushaq qulaǵannan keıin 4 kún ótken soń Túrkııa prezıdenti Redjep Taııp Erdoǵan bizdiń Prezıdentimizben baılanysqa shyqty. Birden aıta keteıin, áńgimelesý óter kúrdeli jaǵdaıda boldy. Onyń sebebi Nursultan Nazarbaev túrik áskerı kúshteriniń áreketin túbegeıli qoldaǵan joq», - dedi ol.
Sonymen qatar ol Qazaqstan Prezıdenti kez kelgen janjaldy beıbit jolmen retteý qajettigin jaqtaıtyndyǵyn basa aıtty.
«Áńgimelesý barysynda Memleket basshysy Reseı men Túrkııa arasyndaǵy uzaq jyldarǵa sozylǵan dostyq qarym-qatynasty atap ótti ári áriptesine jaǵdaıdy beıbit jolmen retteýge múmkinshilik bar ekendigin aıtty. Áńgimelesý sońynda Erdoǵan Reseı prezıdentimen kelissóz júrgizýge kelisimin berdi», - dedi Nurlan Onjanov.
Aıta keteıik, derekti fılmde Túrkııanyń shekara aýmaǵyna kirip ketken Reseıdiń SÝ-24 ushaǵynyń atyp túsirilýinen keıin eki eldiń arasyndaǵy ahýaldyń shıelenisýi jáne ony sheshýdegi Qazaqstan Prezıdenti Nursultan Nazarbaevtyń róli jan-jaqty talqylanǵan. Keltirilgen derekterge qaraǵanda, osy oqıǵadan keıin eki eldiń arasyndaǵy jaǵdaı ýshyǵyp, Reseı Túrkııaǵa qarsy ekonomıkalyq sanktsııalar qoldanyp, vızasyz rejımdi alyp tastaǵan.
