Elbasy týraly «Juldyzdar toǵysqanda» fılmi kórermenge jol tartady
Reseılik kıno mamany, rejısser Sergeı Snejkınnyń týyndysy QR Prezıdentiniń ómiri men qyzmetine arnalǵan «Elbasy joly» kınoepopeıasynyń jalǵasy bolyp tabylady. Aıta keterligi, jańa fılm Nursultan Nazarbaevtyń ómirindegi asa qyzyqty kezeńdi, Elbasynyń 1984 jyly Qazaq KSR Mınıstrler keńesiniń tóraǵasy qyzmetine taǵaıyndalyp, 1991 jyly Táýelsiz Qazaqstan Respýblıkasynyń Prezıdenti bolyp saılanǵanǵa deıingi kezeńdi qamtyp otyr. Basty róldi elimizdiń tanymal akteri Berik Aıtjanov somdaǵan.
«Shyndyǵynda bul qarapaıym týyndy emes, kınony ekranǵa shyǵarý arqyly elimizdiń tarıhyna basqasha kózqaraspen qaraýǵa da bolady. Óıtkeni, shyndyǵynda Táýelsizdik jyldary qarapaıym halyq bile bermeıtin kóptegen oqıǵalar oryn alyp jatty, bul oqıǵalar bizdiń elimizge ǵana emes, búkil álemniń ózgerýine qatysty bolatyn. Jalpy, Elbasynyń ótken ómir jolyna úńilsek, N. Nazarbaevtyń árbir qadamy týraly jeke-jeke fılm túsirýge de bolatyndaı. Degenmen, Sergeı Snejkınniń sheberligi arqasynda biz elimizdiń úlken tarıhı betburystar men ózgerister kezeńin úsh saǵattyq týyndyǵa syıǵyzyp otyrmyz», - dedi brıfıngte Mádenıet jáne sport mınıstri Arystanbek Muhamedıuly.
Onyń sózine qaraǵanda, fılmdi túsirýge Qazaqstan men Reseı kınomamandarynyń joǵary bilikti shyǵarmashylyq komandalary atsalysqan. Kıno eki elde tórt aı boıy túsirildi.
Mınıstrdiń aıtýynsha, fılm negizinen elimizdiń jastaryna arnalady.
Aıta keteıik, fılm sıýjeti boıynsha aǵylshyn jazýshysy Djeremı Vılson Nursultan Nazarbaevpen suhbattasý maqsatynda onymen kezdesýdiń retin izdeıdi. Alaıda josparlanǵan suhbat jas memlekettiń qurylýyn baıandaıtyn tarıhı áńgimege aınalyp ketedi. Jýrnalıst Nursultan Nazarbaev eske alǵan oqıǵalardyń kýási bolyp, 1950-1991 jyldar arasynda órbigen oqıǵalarǵa «sapar shegedi».
Kartına 28 sáýirden bastap qalyń jurtshylyq nazaryna usynylady dep josparlanýda.
