Elbasy týraly zańnyń kúshin joıý bıýdjetten qosymsha qarjyny talap etpeıdi - Erlan Saırov

ASTANA. QazAqparat – Elbasy týraly zańnyń kúshin joıýǵa qatysty kópshiliktiń suranysyn eskere otyryp, tıisti zań jobasy daıyndyldy. Bul týraly Parlament palatalarynyń birlesken otyrysynda Májilis depýtaty Erlan Saırov aıtty, dep habarlaıdy QazAqparat tilshisi.

«Nazarlaryńyzǵa «QR Birinshi Prezıdenti - Elbasy statýsy» jónindegi Konstıtýtsııalyq zańnyń kúshin joıý jónindegi Konstıtýtsııalyq zań jobasy usynylyp otyr. Byltyr búkilhalyqtyq referendým nátıjesinde elimizde jańa Konstıtýtsııa qabyldandy. Jańa Konstıtýtsııany jaqtap Qazaqstan halqynyń 77 paıyzdan astamy daýys berdi. Konstıtýtsııalyq reforma - elimizde bılik tarmaqtary ınstıtýttaryn nyǵaıtyp, qoǵamda demokratııany qalyptastyrýdaǵy Táýelsiz 30-jyldyń ishindegi iri qadam, progressıvti baǵyt-baǵdar. Ata Zańǵa engizilgen ózgertýlerge sáıkes, QR Tuńǵysh Prezıdenti - Elbasynyń mártebesi men ókilettigi Respýblıka Konstıtýtsııasymen jáne konstıtýtsııalyq zańmen aıqyndalady degen normany kózdeıtin Konstıtýtsııanyń 46-baby 4-tarmaǵy alynyp tastaldy», - dedi E. Saırov.

Onyń paıymynsha, Qazaqstannyń demokratııa men plıýralızmge bet alyp, tereń saıası transformatsııa jasaý kezeńinde, jeke toptardyń bılikti menshikteýge jeteleıtin qandaı da bir tetikterge jol bermeý mańyzdy. Sondyqtan Qazaqstan Respýblıkasy Májilisiniń bir top depýtaty halyqtyń basym kópshiliginiń suranysyn eskere otyryp, atalǵan zań jobasyn usyndy.

«Óz kezeginde «Jańa Qazaqstan» depýtattyq toby atalǵan máselege qatysty Konstıtýtsııalyq Sotqa júgindi. Konstıtýtsııalyq Sot «Qazaqstan Respýblıkasynyń Birinshi Prezıdenti - Elbasy statýsy» jónindegi Zańnyń elimizdiń jańa Ata Zańyna sáıkes kelmeıtindigi jóninde sheshim qabyldady.

Joǵaryda aıtylǵandy basshylyqqa alyp, saıası-quqyqtyq negiz joq ekendigin eskere otyryp, «Qazaqstan Respýblıkasynyń Birinshi Prezıdenti - Elbasy statýsy» jónindegi Konstıtýtsııalyq Zańnyń kúshin joıý jónindegi Konstıtýtsııalyq qujat jobasy usynyldy. Bul zańnyń qabyldanýy teris quqyqtyq jáne áleýmettik-ekonomıkalyq saldarǵa ákelmeıdi, bıýdjetten qosymsha qarjyny talap etpeıdi», - dedi depýtat.

Budan buryn habarlanǵandaı, Konstıtýtsııalyq sot 10 qańtarda Konstıtýtsııanyń 62-babynyń 4-tarmaǵyn resmı túsindirý týraly № 2 normatıvtik qaýlysyn shyǵardy.

Osy oraıda Elbasy týraly zańnyń Qazaqstanda qoldanysta qalýyna quqyqtyq negiz joq ekenin atap ótildi.