Elbasy týraly zańnyń kúshin joıý: Arnaıy komıssııaǵa depýtattar irikteldi

ASTANA. QazAqparat – Májilistiń jalpy otyrysynda «QR Tuńǵysh Prezıdenti - Elbasy týraly» Konstıtýtsııalyq zańnyń kúshi joıyldy dep taný týraly» Konstıtýtsııalyq zań jobasy boıynsha birlesken komıssııanyń quramyna enetin depýtattar irikteldi, dep habarlaıdy QazAqparat tilshisi.

«Parlament Reglamentiniń 32-5-tarmaǵyna sáıkes «QR Tuńǵysh Prezıdenti - Elbasy týraly» Konstıtýtsııalyq zańnyń kúshi joıyldy dep taný týraly» Konstıtýtsııalyq zań jobasy boıynsha birlesken komıssııanyń quramyna Májilisten kelesi depýtattardy usynamyz: Bekjanov Berik Aıdarbekuly, Erýbaev Serik Sársenuly, Smaılov Erlan Valerııuly», - dedi depýtat Arman Qojahmetov.

Jalpy otyrys barysynda palata depýtattary bul usynysqa qoldaý bildirdi.

Budan buryn habarlanǵandaı, Konstıtýtsııalyq sot 10 qańtarda Konstıtýtsııanyń 62-babynyń 4-tarmaǵyn resmı túsindirý týraly № 2 normatıvtik qaýlysyn shyǵardy.

Osy oraıda Elbasy týraly zańnyń Qazaqstanda qoldanysta qalýyna quqyqtyq negiz joq ekenin atap ótildi.