Elbasy týraly zamandastary ne deıdi?
ASTANA. QazAqparat - Ǵafý Qaıyrbekovtiń Elbasyǵa jyr arnaǵanyn biletin bolarsyzdar. «Synǵa túsken ekiudaı tusta myna, Qaramaıdy ol baqytqa, bas qamyna. Laıyq ol, baıqasań, qazaq túgil, Álemdi de ádemi basqarýǵa!», dep jazǵan.
«Bizdiń alyp-qosarymyz joq. Aqyn bir shýmaqpen ajarly teńeý ǵana emes, kóregendik aıtty. «Álemdi de ádemi basqarýǵa» degende aqyn Elbasynyń alar asýlary men shyǵar shyńdaryn sezinip, senip jazǵan eken», - deıdi Qazaqstan ulttyq arnasynda tilshi «Apta.kz» baǵdarlamsynda. Nursultan Nazarbaev. Suńǵyla saıasatker. Qajyrly qaıratker. Elin súıgen er. Ultynyń dástúrin dáriptep, ónerin súıgen ul. Al qasıeti bólek Elbasy týraly zamandastary ne deıdi? Maqsut Nárikbaev, qoǵam jáne memleket qaıratkeri: - Qazirgi Qytaıdyń basshysy qandaı sóz aıtty? «Biz Prezıdent Nazarbaevtyń saıası kóregendigine tańǵalamyz», deıdi. Kórdińiz be? 92-jyly osy Azııa qurlyǵyna baılanysty osyndaı bir qoǵamdyq qurylymdy jasaý máselesin BUU-nyń minberinen Prezıdent Nazarbaev usynǵan edi. Al qazir 20 shaqty el múshe bolyp otyr, dep Qytaıdyń birinshi basshysy aıtyp ketti. Osynyń ózi menińshe barlyǵy Elbasymyzdyń joǵary deńgeıde ekeniniń birden-bir dáleli dep esepteımin. Elge eńbekaqy taýyp bere almaı otyrǵan kezde, zeınetaqysyn ýaqytynda tóleı almaı jatqan kezde bálenshe mıllıardty qajet etetin kóship-qonýdy qaıtemiz degen sóz boldy. Al biraq Elbasynyń kóregendigi sol, osy Astanany ekonomıkalyq turǵyda kóterý arqyly, búkil Qazaqstandy damytatyn mehanızmniń bar ekendigin bilip otyrǵan. Bir jyl emes, eki jyl emes, úsh jyldan keıin búkil memleketimizdiń qurylysy bastaldy da ketti. Iá, Astana - qazaqtyń aıbyny. Abyroıy. Ataq-dańqy. Ar-ujdany. Astana álemdik saıasattyń alqasy. Jahandyq úrdisterdiń arqasy. Astana - on shaqty jyl omalyp qalǵan OBSE-niń boıyna qan júgirtip, Islam yntymaqtastyq uıymyna jan bitirgen shahar. Astana - ozyq oıdyń bastaýy. Astana - sarabdal saıasattyń kózi, naǵyz kóshbasshy qalanyń ózi. Ýálıhan Qalıjan, qoǵam qaıratkeri: - Qazir Astana tek qana Ortalyq Azııa memleketteri úshin ǵana qajet emes, qazir búkil Shyǵys Azııa, Eýropa Qazaqstanǵa nazar aýdaryp otyr jáne Nazarbaevpen sanasady, Nazarbaevpen aqyldasady. Teńgeniń endi shyǵa bastaǵan kezi. Ózi qazaq, rýhy orys jýrnalıst suraq qoıdy. «Nursultan Ábishuly, qazaqta teńge degen sóz joq qoı. Neǵyp ony teńge dep jatyrsyz. Odan da sol rýbl aımaǵynda qala bermeımiz be» dep.Sonda Nazarbaev julyp alǵandaı: «Áı, aınalaıyn, seniń qazaqtyń epostarynan habaryń bar ma?! Sen «Aıman-Sholpandy» oqydyń ba? Eger sol «Aıman-Sholpandy» oqysań mynandaı joldar bar emes pe?! «Bazarda teńge bolsań, pul bolarsyń, Kótekeńniń aıtqany ras bolsa, qolyma sý quıatyn kúń bolasyń», deıdi. Sol bir aýyz sózben sol jerde Prezıdent búkil máseleni sheship jiberdi. «Nursultan Nazarbaev - jastaıynan zerek, ortasynan ozyq turatyn tulǵa. Eńbekke de erte aralasyp, eldegi úlkenderge qolqabys qylýdan eshqashan aıanbaǵan. Eń bastysy, aǵaıynǵa orman, dostyqqa qorǵan, «meni» kem, aldy keń azamat», -deıdi zamandas dosy Sádýaqas aǵa. Sádýaqas Esimbaı, Prezıdenttiń synyptas dosy: - Dosqa degen nıeti óte joǵary bolatyn. Men ákem soǵystan kelmeı, jetim bolyp óskennen keıin men úı saldym. Sol úıge ol Ýkraınadan kelip, balshyǵyn kóterip, ákesi men sheshesi járdemdesip, maǵan úı salyp bergen. Sol úı qazirge deıin bar. Nursultannyń salǵan úıi deıdi. Nursultan Nazarbaev jastyǵynda dosyna úı salyp berse, eseıe kele eńbekqorlyǵy men qajyr-qaıratynyń arqasynda qazaqqa táýelsiz shańyraq kóterip berdi. Aınalasyndaǵy alpaýyttarmen arazdaspaı-aq, táýelsiz eldiń shekarasyn shegendedi. Janamyn degen jasqa ot berip, shetelde oqytty. Týǵan eliniń turmysyn túzep, eńsesin tiktep, keregesin keń, terezesin ózgelermen teń etti. Bul Nazarbaev tókken terdiń biz tilge tıek etken bir tamshysy ǵana.
