Elbasy týraly «Qazaq. Altyn adam tarıhy» fılmi - taǵlymdy týyndy
Bul óner týyndysynyń bir ereksheligi – ony álemge áıgili rejısser, «Oskar» syılyqtarynyń birneshe dúrkin ıesi, batys kınoındýstrııasynyń ókili Olıver Stoýn syndy bedeldi tulǵanyń óz qalaýymen, óz nıetimen, tikeleı qatysýymen óte joǵary deńgeıde túsirilgeni. Sondyqtan bolar, qazir bul shyǵarma birqatar halyqaralyq festıvalderge qatysýǵa usynylǵan.
Fılmniń basty keıipkeri Elbasy Nursultan Ábishuly erkin, beıresmı ahýalda jalǵasatyn keń aýqymdy, kóp jaǵdaıda tarıh qoınaýlarymen astarlasyp ketetin tereń suhbatynda Altaı men Atyraý, Alataý men Arqa arasynda kósilip jatqan keń baıtaq qazaq dalasynda Táýelsiz Qazaqstan memleketiniń qurylýy men damýynyń mol shejiresimen bólisedi.
Osyndaı uly, kúrdeli de qasterli kezeńniń árbir qas-qaǵym sátin boıynan, júreginen ótkizgen jan retinde áńgime ıesiniń búgingi egemen elimiz - san ǵasyrlar kóleminde baıyrǵy qazaq jerin mekendegen birtutas halyqtyń, adamzat ǵumyrnamasynda máńgilik izderi qalǵan irgeli memleketterdiń zańdy murageri ekendigin taıǵa tańba basqandaı tarqatýy, dál qazirgi ýaqytta óte mańyzdy.
Bul turǵyda fılmniń ataýynyń, ıaǵnı Altyn adam tarıhynyń alynýy barynsha utymdy shyqqanyn aıtar edim.
Rasynda, men ózim halyqaralyq qatynastar salasynyń mamany, qyzmet babymen kóptegen shet memleketterde, sonyń ishinde eýropalyq elderde uzaq merzim bolǵan adam retinde ondaǵy jurtshylyqty búginginiń jańalyqtarymen tań qaldyrý qıyn ekendigin jaqsy bilemin.
Tehnogendik turǵydan damýdyń bıigine jetken qoǵamdardyń endigi jan-dúnıelik, oı-sanalyq, rýhanı qanaǵatshylyqty umyt bola bastaǵan ótken kezeńderden, belgili bir sebeptermen ózderi sezine almaǵan, bálkim múlde aıyrylǵan qundylyqtardan izdeý úderisi baıqalady.
Sondyqtan Elbasy týraly fılm barsha adamzattyń bolmysyna tikeleı yqpalyn tıgizgen bizdiń babalarymyzdan bastaý alatyn, negizgi qundylyqtary áli de aıqyn saqtalyp kele jatqan kóshpeli uly órkenıet pen qazirgi zaman arasyndaǵy ajyramas arqaýdy beıneleıtin erekshe týyndy ekendigine kúmán joq.
Fılmniń mýzykasyna ózimizdiń tól ulttyq aspaptarymyzdyń eshqashan kómeskilenbeıtin qaıtalanbas ǵajap áýenderi alynýy da tegin emes.
Qandaı el bolmasyn, ótkendi qurmettep, búgingini baǵamdaı almasa, erteńgi bolashaǵyna senimdi qadam basa almaıdy.
Qısapsyz synaqtardan - Aqtaban shubyryndy jaýgershilik zamandar, otarlyq kezeń, tamyrsyz tóńkeris, zulmat ashtyq pen soǵys, týǵan jerimizdiń ózegin titirentken alapat ıadrolyq synaqtar, ózen-teńizderdiń joıylýy, ana tilimizge, ulttyq bolmysymyzǵa jasalǵan aýyr qııanattardy basynan ótkergen qasıetti halqymyzdyń Táýelsizdikke jetýi qanshalyqty qıyn bolsa, onyń týyn qulatpaı, tuǵyryn nyǵaıtý da asa jaýapty paryz.
Tuńǵysh Prezıdentimiz erteńge degen eldiń úmitin oıatyp, senimin aqtaý úshin jan aıamaı jumys istegeni, ótpeli, tapshylyq jyldardaǵy qarsylyqtarǵa qaramastan Saryarqa tósinde jańa elordamyzdyń shańyraǵyn tigip, halyqtyń ál-aýqatyn arttyrýdy ómiriniń basty qaǵıdasy retinde tańdap alǵany, árıne, mundaı aýqymdy ári kútýge kelmeıtin qystalań shaqtarda qatelikterdiń oryn alatyny jóninde de búkpesiz baıandaıdy.
«Óz tarıhy týraly shyndyqty aıta almaǵan halyq máńgilik quldyqta ótedi», - degen asyltekti Alash zııalylarynyń pikirine súıensek, osynaý «Qazaq. Altyn adam tarıhy» fılmi arqyly bizder elimizdiń ótkenine taǵy bir márte qaıta oralyp, bolashaǵyna baǵdar aldyq dep sanaımyn.
Fılmniń basty motıvi dep men jeke kórermen retinde osynaý tolqynysty kúıdi búkil tula boıymmen sezindim, aıryqsha áserge bólendim.
Qarańyzshy, taǵdyr bizge ushy-qıyry joq darhan dalamyzdy bergenine myń márte táýba ete otyryp, sonymen birge aınalamyzda irgeli, yqpaldy memlekettermen kórshi ekenimiz aıan. Demek, Elbasy negizin qalaǵan syndarly syrtqy saıasatymyzdyń arqasynda kórshi eldermen strategııalyq áriptestik qarym-qatynastardyń ornatylýynyń mańyzdylyǵy qanshalyq orasan.
Munyń barlyǵy eldiń ishindegi ózgerister úshin qolaıly jaǵdaı jasaý, turǵyndardyń ómiriniń alańsyz bolýy múddesine baǵyttalǵany aqıqat.
Fılm rejısseri bir sózinde Nursultan Nazarbaev dáýirdiń qabiletti de talantty basshylary arasynda bolashaqty alystan boljaıtyn sırek qabiletimen jáne qarymdy kúsh-jigerimen daralanatyny, ol memlekettik júıeni túbegeıli ózgertý úshin ǵana emes, alyp Eýrazııa keńistiginde keshe ǵana totalıtarlyq júıe qyspaǵynan shyqqan, oılaý, sheshim qabyldaý, óz betinshe áreket etý erkindiginen aıyrylǵan, al endigi onyń bárin qysqa merzim arasynda eńserip, demokratııa dástúrleri men joǵary adamgershilik qundylyqtar ornaǵan baıypty qoǵam ornatý úshin de damylsyz eńbektengen biregeı tulǵa ekenin, anyǵy, sol úshin de óz týyndysynyń keıipkeri retinde tańdaǵany týraly ashyǵynan málimdegen edi.
Sondyqtan búgingi bizderdiń, keleshek urpaqtardyń aldynda qasterli Ata mekenimiz – Qazaqstandy búkil álem moıyndaıtyn, jahan jurtshylyǵy tanıtyn, ári qurmetteıtin memleket retinde saqtap damytýdyń abyroıly paryzy tur.
Olaı bolsa, osyndaı syndarly, jaýapty kezeńde elimizdiń atqarýshylyq, zańnamalyq, sot bıligi tárizdi barlyq butaqtary, barsha Qazaqstan halqy «Bir jeńnen qol, bir jaǵadan bas shyǵaryp», Memleket basshysy Qasym-Jomart Kemeluly Toqaevtyń júrgizip kele jatqan syndarly saıasatyn bir kisideı qoldaı otyryp, ejelden jaqsylyqqa jany qumar, peıili darhan dalasyndaı, Dımashtyń asqaq daýysyndaı, parasaty bıik Alash jurtynyń ulttyq jańǵyrýy, áleýmettik, rýhanı órleýimen bir arnada keleshek ǵasyrlarǵa qaryshty qadam basa beretindigi kámil!
